Xiaomi HyperOS-də Google servislərindən imtina edə bilər

     İxtisaslaşmış KİV-lərin məlumatına görə, Xiaomi şirkəti OPPO, Vivo və OnePlus brendlərinin ana şirkəti olan BBK Group və HUAWEI ilə birgə Android əməliyyat sisteminə alternativ yaratmaq məqsədilə əməkdaşlıq etməyi planlaşdırır. Söhbət sadəcə yeni bir interfeys hazırlamaqdan getmir - gözlənilir ki, Çin istehsalçıları Google ekosistemindən tamamilə imtina edəcəklər. Sahə üzrə analitiklərin fikrincə, Google məhsullarından tam imtina şirkət məhsullarına olan istifadəçi marağının azalmasına səbəb ola bilər.

     Digər tərəfdən, müstəqil əməliyyat sisteminin hazırlanması ABŞ tərəfindən tətbiq oluna biləcək sanksiyalara qarşı bir növ “sığorta” rolunu oynayacaq və amerikalı proqram təminatı istehsalçılarından asılı olmayan alternativ ekosistemin qurulmasına imkan verəcək. Xiaomitime tərəfindən yayımlanmış məlumata görə, söhbət proqram təminatının inkişafında kəskin kurs dəyişikliklərindən getmir. Böyük ehtimalla, Xiaomi tədricən Google-dan asılılığı azaltmaqla yanaşı, daxili ekosistem xidmətlərinin təkmilləşdirilməsinə daha çox diqqət ayırmağa başlayacaq.

     Daha əvvəl HUAWEI də oxşar addım atmış və bu günə qədər bəzi ölkə bazarlarında EMUI interfeysi ilə smartfonlar təqdim etməyə davam etmişdir. Gözlənilir ki, Çin texnologiya nəhənglərinin - Xiaomi, BBK Group və HUAWEI - birgə əməkdaşlığı onların smartfonlarının qlobal bazarda payını qoruyub saxlamasına və alternativ mobil əməliyyat sistemlərinin dünya səviyyəsində təsirini artırmasına kömək edəcək. Bununla belə, Xiaomi bu məsələ ilə bağlı hələlik rəsmi açıqlama verməyib.

Mənbə: Xiaomitime