Apple öz ekosistemini kənar tətbiq mağazaları üçün məcbur açmalı olacaq

    Avropa Komissiyası bazar monopoliyası baxımından ən təhlükəli olan şirkətlərin və servislərin siyahısını təqdim edib. Təqdim edilmiş siyahıdakı şirkətlər və servislər gələcəkdə sərt nəzarət altına alınacaqlar. Beləliklə siyahıya Alphabet (Google şirkətinin sahibi), Amazon, Apple, Meta Platforms, Microsoft və ByteDance (TikTok-un sahibi) şirkətləri daxil olublar. Bu şirkətlər ümumilikdə 22 ədəd servisə sahibdirlər və həmin servislər 24 mart 2024-cü il tarixindən başlayaraq Avropa Birliyinin rəqəmsal bazarlar ilə bağlı DMA adlı qanununa riayət etməli olacaqlar. DMA qanununun əsas məqsədi Avropa Birliyinin böyük texnoloji şirkətlərin bazardakı hakimiyyətlərini cilovlamaqdır.

    Sözügedən qanun layihəsi çərçivəsində böyük texnoloji şirklətlər öz platformalarını daha açıq etməli və bazarda yalnız öz məhsullarının üstünlükləri hesabına rəqabət aparmalıdırlar. Məsələn şirkətlərin sahib olduqları əməliyyat sistemləri kənar tətbiq mağazalarından istifadəni mümkün etməli, rərəmsal kontentlərin istifadəçilər arasında yayılmasına imkan verən platformalara sahib şirkətlər isə tərtibatçılara fərdi məhsullarında kənar ödəniş sistemlərindən istifadəyə icazə verməlidirlər.

    Bu isə o deməkdir ki, məsələn Apple şirkəti iOS-i kənar tətbiq resursları və ödəniş sistemləri üçün açmaq məcburiyyətində qalacaq. DMA-nın siyahısına daxil olan servislərə gəldikdə isə bura TikTok, Facebook, Instagram və LinkedIn sosial platformaları, Facebook Messenger və Whatsapp messencerləri, Google Play, Google Maps, Google Shopping, Amazon Marketplace, App Store və Meta Marketplace servisləri, Youtube, Google, Amazon və Meta-nın reklam servisləri, Google Search axtarış sistemi, Google Chrome və Apple Safari brauzerləri, Android, iOS və Windows əməliyyat sistemləri daxildirlər.