Microsoft şirkəti süni zəka əsaslı Bing Chat çat-botunun dəstəyini mobil cihazlarda genişləndirəcək. Sözügedən çat-bot brauzerlərin Android və iOS üçün nəzərdə tutulmuş müəyyən mobil versi`yalarında aktiv olsa da, Microsoft onun bütün mobil brauzerlərdə dəstəklənməsini istəyir. Qeyd etmək lazımdır ki, süni zəka əsaslı Bing Chat bu ilin fevral ayında təqdim olunmuşdu. Lakin ilk növbədə çat-bot yalnız Microsoft Edge brauzerində çalışırdı.

    Keçən ayın sonunda isə şirkət Bing Chat dəstəyini həmçinin Google Chrome və Apple Safari brauzerlərinə əlavə etdi. “Bing Chat son zamanlarda yeni və faydalı funksiyaları əldə edib. Buna görə də biz yaxın zamanda onun kənar brauzerlərin həm veb həm də mobil versiyalarda dəstəklənəcəyini elan edirik” - deyə Microsoft qeyd edib. Şirkət bildirib ki, o, son zamanlarda Edge brauzerinin məşhurluğunun artdığını müşahidə edib. Çox güman ki, son 6 ay ərzində sözügedən brauzerin məşhurluğunun artması məhz Bing Chat ilə əlaqəlidir. Belə ki, daha öncə Bing Chat yalnız Edge brauzerində aktiv idi.