ChatGPT tətbiqinin Android versiyası bu həftə istifadəyə veriləcək

    Aktivliyin aşağı düşməsinə baxmayaraq süni zəka əsaslı ChatGPT çat-botu hələ də istifadəçilər arasında çox məşhurdur. Çat-botun veb versiyası keçən ilin noyabr ayında, iOS üçün nəzərdə tutulmuş tətbiqi isə may ayında istifadəyə verildi. İndi isə OpenAI şirkəti çat-bot tətbiqinin Android versiyasını istifadəyə verməyə hazırlaşır. Şirkətin verdiyi məlumata əsasən ChatGPT-nin Android üçün olan tətbiqi rəsmi olaraq bu həftə işə salınacaq. Şirkət konkret tarixi qeyd etməsə də, tətbiqin Google Play Market-dəki səhifəni təqdim edib.

    İstifadəçilər tətbiqin Google Play Market-dəki səhifəsinə keçid edərək ondan istifadə üçün nəzərdə tutulmuş gözləmə siyahısına yazıla və tətbiqi yükləyə bilərlər. Tətbiq aktivləşdiriləndən sonra isə ondan istifadə etmək mümkün olacaq. Beləliklə şirkət ChatGPT-nin iOS versiyasını işə salandan 2 ay sonra Android versiyanı da işə salmağa hazırlaşır. Gözləntilərə əsasən tətbiqin Android versiyası iOS versiyadan heç də fərqlənməıyəcək. İstifadəçilər tətbiq daxilində ChatGPT-nin həm pulsuz həm də ChatGPT Plus adlı pullu versiyasından istifadə edə biləcəklər.