Microsoft-a məxsus olan GitHub servisi özünün Copilot adlı alətinə səslə idarəetmənin inteqrasiyası üzrə təcrübələr aparır. Qeyd etmək lazımdır ki, Copilot aləti kod sətrinin neyron şəbəkə vasitəsilə avtomatik doldurulması üçün nəzərdə tutulub və bu halda neyron şəbəkə kod sətrini açıq bazalarda axtarış vasitəsilə doldurur. “Hey, GitHub” ifadəsi vasitəsilə klaviaturadan istifadə etmədən kodun səs vasitəsilə daxil edilməsi üçün Copilot-u işə salmaq olar.

    Bu bir növ istifadəçinin Apple Siri və Google Assistant səsli köməkçiləri ilə qarşılıqlı əlaqəsinə bənzəyir. Səsli idarəetməni əhatə edəcək funksiyalar GitHub-ın Copilot-dan istifadə edən istifadəçiləri üçün aktiv olacaq. Qeyd etmək lazımdır ki, Copilot-dan istifadə üçün istifadəçilər hər ay 10$ abunəlik haqqı ödəməlidirlər. GitHub bu aləti 2022-ci ilin əvvəlində istifadəyə vermişdi. O, kodun yazılması mövzusunda proqramçılara yardım üçün nəzərdə tutulub.