Digər şirkətlərlə yanaşı Opera da süni zəka texnologiyaları vasitəsilə öz brauzerinin imkanlarını genişləndirir. Bu istiqamətdə şirkət öz brauzeri daxilində istifadə üçün nəzərdə tutulmuş Aria adlı süni zəka əsaslı çat-botu istifadəyə verib. Sözügedən çat-bot pulsuz şəkildə təklif edilir və onun aktivləşdirilməsi üçün nəzərdə tutulmuş xüsusi düymə brauzerin yan panelində yerləşdirilib. İstifadəçi həmin düyməyə klikləyən zaman çat-botla qarşılıqlı əlaqə pəncərəsi ortaya çıxır. Məlumatda qeyd edilib ki, Aria istifadəçilərin suallarına cavab verə və mətnlər ilə proqram təminatı kodlarını tərtib edə bilir.

    ChatGPT-nin standart versiyasından fərqli olaraq Aria internetdə aşkar edilmiuş sorğu nəticələrini real zaman ərzində istifadəçiyə təqdim edir. Qeyd etmək lazımdır ki, hələ fevral ayında Opera-nın yan panelinə ChatGPT-dən istifadə imkanı əlavə edilmişdi. Bu imkan vasitəsilə istifadəçilər veb səhifələri və məqalələri ümumiləşdirə bilirlər. Aria-ya gəldikdə isə onu brauzerin həm veb həm də mobil versiyasında işə salmaq mümkündür. Veb versiyadan istifadə etmək üçün istifadəçi ilk növbədə kompüterə Opera One brauzerinin tərtibatçılar üçün nəzərdə tutulmuş versiyasını yükləməlidir. Android cihazlarda isə adi Opera tətbiqinin ən son versiyası yüklənməlidir. Bununla yanaşı istifadəçi Opera hesabı yaratmalı olacaq.