Avropa Komissiyası TikTok-u hədəfə aldı: Dizayn dəyişdirilə bilər

    Technote.az "The Verge” platformasına istinadən bildirir ki, Avropa İttifaqının tənzimləyici qurumları TikTok platformasının “asılılıq yaradan dizaynı”nın Rəqəmsal Xidmətlər Aktını (DSA) poza biləcəyini açıqlayıb. Avropa Komissiyasının davam edən araşdırması çərçivəsində yayımlanan ilkin nəticələrə görə, bu iddialar təsdiqlənərsə, TikTok böyük məbləğdə cərimə ilə üzləşə və xidmətinin əsas dizaynını dəyişməyə məcbur edilə bilər.

    Avropa Komissiyası xüsusilə TikTok-un sonsuz sürüşdürmə (infinite scroll), avtomatik video oynatma, push bildirişləri və yüksək səviyyədə fərdiləşdirilmiş tövsiyə alqoritmini tənqid edib. Qurumun fikrincə, bu mexanizmlər istifadəçilərin fiziki və psixoloji sağlamlığına zərər verə biləcək “asılılıq yaradan” təsirlərə qarşı kifayət qədər qoruyucu mexanizmlərlə müşayiət olunmur.

    Komissiyanın açıqlamasında bildirilir ki, istifadəçilərin davamlı olaraq yeni məzmunla “mükafatlandırılması” beynin “avtopilot rejimi”nə keçməsinə səbəb olur və bu da özünüidarəni zəiflədərək kompulsiv davranışlara yol aça bilər. Elmi araşdırmaların da bu riski təsdiqlədiyi vurğulanır. Tənzimləyicilər TikTok-un mövcud valideyn nəzarəti və ekran vaxtı alətlərini yetərsiz hesab edir. Bildirilir ki, platforma sonsuz sürüşdürməni məhdudlaşdırmalı, tövsiyə alqoritmini uyğunlaşdırmalı və təhlükəsizlik mexanizmlərini daha effektiv etməlidir.

    TikTok isə ittihamlarla razılaşmır. Şirkətin Financial Times-a verdiyi açıqlamada deyilir ki, Komissiyanın ilkin nəticələri platformanı tamamilə yanlış və əsassız şəkildə təqdim edir və TikTok bu qərara qarşı bütün hüquqi vasitələrlə mübarizə aparacaq. Araşdırma 2024-cü ilin fevralında başlayıb və artıq TikTok-un reklam şəffaflığı və tədqiqatçılara açıq məlumatların təqdim edilməsi sahəsində qanun pozuntularına yol verdiyi müəyyən edilib. DSA-nın pozulması təsdiqlənərsə, şirkət qlobal illik dövriyyəsinin 6 faizinə qədər cərimələnə bilər.