Discord Braziliyada böyük məhkəmə işi ilə üzləşib

    Braziliya federal hökuməti istifadəçilərin yaşının yoxlanılması və uşaqların təhlükəsizliyinin təmin edilməsində ciddi çatışmazlıqlar olduğunu əsas gətirərək Discord-u məhkəməyə verib. Hökumət şirkətdən 500 milyon Braziliya realı, təxminən 97 milyon dollar məbləğində kollektiv mənəvi zərərin ödənilməsini tələb edir. İddia Braziliya hökumətinin hüquqi nümayəndəsi olan Baş Prokurorluq (AGU) tərəfindən paytaxt Braziliyada federal məhkəməyə təqdim edilib. Məhkəmə hökumətin tələblərini təmin edərsə, Discord-a qaydalara uyğunlaşmaq üçün 15 gün vaxt veriləcək. Tələblərin yerinə yetirilmədiyi hər gün üçün isə əlavə 500 min real cərimə nəzərdə tutulur. Lakin hökumətin əsas məqsədi Discord-dan pul almaq deyil. İddiada platformanın Braziliyadakı fəaliyyətində bir sıra ciddi dəyişikliklər etməsi tələb olunur.

    Bunların arasında canlı yayımlarda özünə zərərvermə və ekstremal zorakılıq məzmununun real vaxt rejimində aşkarlanaraq bloklanması, seksual şantaj hallarının dövlət qurumlarına bildirilməsi üçün xüsusi mexanizmin yaradılması və istifadəçinin sadəcə doğum tarixini yazmasına əsaslanmayan real yaş yoxlama sisteminin tətbiqi var. Bundan əlavə, 16 yaşdan kiçik istifadəçilərin hesablarının valideyn və ya qəyyum hesabı ilə əlaqələndirilməsi, yeni hesabların server dəvətlərinə məhdudiyyət qoyulması, bloklanan serverlərin yenidən yaradılmasının qarşısının alınması və portuqal dilində daimi şikayət kanalının yaradılması tələb edilir.

    Braziliya hökuməti Discord-un ölkədə rəsmi ofis açmasını və hüquqi nümayəndə təyin etməsini də istəyir. Eyni zamanda platformanın Braziliyadakı istifadəçi sayına uyğun səviyyədə moderasiya heyətinə sahib olması tələb olunur.