Discord yaş təsdiqi planının qlobal tətbiqini təxirə saldı

     Technote.az “TechCrunch” platformasına istinadən bildirir ki, Discord istifadəçilərin sərt reaksiyasından sonra yaş təsdiqi sisteminin qlobal miqyasda tətbiqini gecikdirdiyini açıqlayıb. Şirkət əvvəlcə bütün istifadəçilərin yetkin olduqlarını təsdiqləyənə qədər avtomatik olaraq “yeniyetmələr üçün uyğun təcrübə” rejiminə keçiriləcəyini bildirmişdi. Bu qərar platformada ciddi narazılıq yaratmışdı.

    Şirkətin texniki direktoru Stanislav Vishnevskiy rəsmi bloq paylaşımında bildirib ki, istifadəçilərin 90 %-i yaşını təsdiqləməli olmayacaq. Onun sözlərinə görə, platformanın daxili təhlükəsizlik sistemləri artıq bir çox yetkin istifadəçini müəyyən edə bilir. Bu sistemlər hesabın yaşı, ödəniş metodunun əlavə edilib-edilməməsi və istifadəçinin qoşulduğu serverlər kimi siqnalları analiz edir.

    Vishnevskiy etiraf edib ki, şirkət bu yeniliyin mübahisə yaradacağını bilirdi, lakin prosesi və məqsədi kifayət qədər aydın izah etməyib. O vurğulayıb ki, hər kəsdən üz skanı və ya şəxsiyyət vəsiqəsi tələb olunacağı ilə bağlı yaranan fikir doğru deyil.

    Yaş təsdiqi tələb olunacaq təxminən 10 % istifadəçi üçün isə alternativ üsullar təqdim ediləcək. Əvvəlcə yalnız üz skanı və ya rəsmi sənəd yükləmək variantı nəzərdə tutulurdusa, indi şirkət kredit kartı vasitəsilə təsdiq imkanını da əlavə etməyi planlaşdırır.

    Şirkət həmçinin təsdiq prosesində iştirak edən tərəfdaşlar barədə daha şəffaf məlumat dərc edəcəyini açıqlayıb. Bildirilir ki, bundan sonra yalnız məlumatların tam şəkildə istifadəçinin cihazında emal olunduğu sistemlərlə işləyəcək.