Facebook və Instagram-da yaş yoxlaması üçün yeni AI texnologiyası işə düşür

    Technote.az “The Verge” platformasına istinadən bildirir ki, Meta şirkəti Facebook və Instagram platformalarında 13 yaşdan kiçik istifadəçiləri aşkar etmək üçün yeni süni intellekt əsaslı sistem tətbiq etdiyini açıqlayıb.

    Şirkətin yaydığı rəsmi məlumata görə, bu sistem istifadəçilərin paylaşdığı foto və videoları analiz edərək “vizual ipucuları” əsasında yaş təxmini aparır. Bu ipucularına insanın boyu, bədən quruluşu və xüsusilə sümük strukturu kimi fiziki xüsusiyyətlər daxildir. Bununla yanaşı, AI sistemi postlar, şərhlər, bio və digər mətn məlumatlarını da analiz edərək istifadəçinin yaşı ilə bağlı əlavə kontekst axtarır.

    Meta bu texnologiyanın üz tanıma sistemi olmadığını xüsusi vurğulayır. Şirkət bildirir ki, AI konkret şəxsin kimliyini müəyyən etmir, sadəcə onun yaş kateqoriyasını təxmin edir. Yeni sistem ilkin mərhələdə ABŞ daxil olmaqla seçilmiş ölkələrdə aktivdir və gələcəkdə daha geniş regionlara yayılması planlaşdırılır. Əgər sistem hər hansı hesabın 13 yaşdan kiçik istifadəçiyə aid olduğunu müəyyən edərsə, həmin hesab deaktiv ediləcək və istifadəçidən yaşını təsdiqləməsi tələb olunacaq.