Facebook yaradıcılar üçün süni intellekt köməkçisi təqdim edib

     Facebook yaradıcıların analitik məlumatları anlamağa daha az, məzmun hazırlamağa isə daha çox vaxt ayırmasını istəyir. Şirkət bu məqsədlə süni intellektlə işləyən yeni Creator Studio tətbiqini istifadəyə verib.

    Avqustun 12-də rəsmi olaraq istifadəyə verilən yenilənmiş Creator Studio, Facebook yaradıcılarına auditoriyalarını daha yaxşı anlamağa, məzmun performansını təhlil etməyə, növbəti paylaşımlarını planlaşdırmağa və izləyicilərlə ünsiyyət qurmağa kömək edir. Tətbiqin məhdud sınaqları isə iyun ayında başlamışdı.

     Meta yeni iPhone tətbiqini Facebook yaradıcıları üçün “süni intellektlə dəstəklənən gündəlik köməkçi” kimi təqdim edir. Creator Studio əsasən üç istiqamətdə fəaliyyət göstərir: yaradıcıların gündəlik prioritetlərini müəyyənləşdirir, auditoriyanı böyütmək üçün fərdiləşdirilmiş tövsiyələr verir və izləyicilərin mesajlarına süni intellekt vasitəsilə cavab hazırlamağa kömək edir.

    Hazırda tətbiq ABŞ və Kanadadakı Facebook yaradıcıları üçün iOS platformasında əlçatandır. Android versiyasının isə daha sonra istifadəyə veriləcəyi gözlənilir.