Florida TikTok-u uşaqlarla bağlı qanunu pozmaqda ittiham edərək məhkəməyə verdi

    ABŞ-nin Florida ştatı TikTok-u uşaqların təhlükəsizliyi ilə bağlı qanunvericiliyə əməl etməməkdə ittiham edərək məhkəməyə verib. İddiada bildirilir ki, platforma ştatın sosial media qanununa baxmayaraq, 13 yaşlı uşaqlara hesab yaratmağa icazə verir və valideynləri tətbiqin riskləri barədə yanlış məlumatlandırır.

    Florida qanunlarına əsasən, 14 yaşdan kiçik uşaqların sosial media hesabı yaratması qadağandır. Bundan əlavə, 14 və 15 yaşlı istifadəçilərin platformaya qoşulması üçün valideyn razılığı tələb olunur. Ştat rəhbərliyi TikTok-un bu qaydalara əməl etmədiyini iddia edir.

   Qeyd olunur ki, sözügedən qanun 1 yanvar 2025-ci ildə qüvvəyə minsə də, sonradan federal məhkəmə tərəfindən dayandırılmışdı. Lakin apellyasiya məhkəməsinin qərarı ilə qanun yenidən tətbiq edilməyə başlanıb. Florida daha əvvəl oxşar səbəblərlə Snap şirkətinə qarşı da iddia qaldırmışdı.

    TikTok-un ABŞ üzrə sözçüsü Jamie Favazza isə bildirib ki, şirkət Florida Baş Prokurorluğu ilə konstruktiv əməkdaşlıq edir və ştatda 14 yaşdan kiçik istifadəçilərə hesablarının dayandırılacağı barədə bildiriş göndərilib.

    İddiada həmçinin TikTok-un istehlakçı hüquqlarını pozduğu da vurğulanır. Florida Baş Prokuroru James Uthmeier platformanın valideynlərə tətbiqdə spirtli içki, tütün və narkotik məzmununun az olduğu barədə yanlış məlumat verdiyini iddia edir. Bundan əlavə, məhkəmə sənədlərində TikTok-un uşaq və yeniyetmələri platformadan asılı vəziyyətə salacaq şəkildə dizayn edildiyi də qeyd olunur.

    TikTok bununla yanaşı, Meta və YouTube ilə birlikdə uşaqların təhlükəsizliyini kifayət qədər təmin etmədiyi iddiası ilə açılmış onlarla digər məhkəmə işi ilə də üz-üzədir.