Instagram orijinallığı itirir: Səbəb süni intellektdir, yoxsa alqoritm?

    Technote.az “The Verge” platformasına istinadən bildirir ki, Instagram-ın rəhbəri Adam Mosseri yaxın həftələrdə platformanın gələcəyi ilə bağlı diqqətçəkən açıqlamalar verib. O, əsas təhlükə kimi süni intellektin Instagram-da sürətlə yayılmasını göstərir və hesab edir ki, yaxın dövrdə platformanı saxta məzmundan fərqləndirəcək əsas amil orijinallıq və insan səsi olacaq.

    Mosseri deyir ki, əvvəllər yalnız insanlara xas olan “real olmaq”, “bağ qurmaq” və “təqlid olunmayan üslub” artıq AI alətləri ilə hər kəs üçün əlçatandır. Onun fikrincə, istifadəçilər parlaq, süni görünən paylaşımlardan çox, daha səmimi və real məzmuna üstünlük verəcək.

    Bununla belə, tənqidçilər hesab edir ki, Mosseri əsas problemi tam düzgün görmür. Çünki Instagram artıq uzun müddətdir ki, robotlaşmış və bir-birinə bənzər məzmunla doludur və bunun hamısı AI tərəfindən yaradılmayıb. Əksinə, insanlar alqoritmin nəyi “mükafatlandırdığını” öyrənir və eyni formatı təkrar-təkrar paylaşırlar. Nəticədə fərqli yaradıcılar belə bir-birinə çox oxşayan paylaşımlar edir.

    Bir çox influencer eyni videonu aylar sonra yenidən paylaşır ki, alqoritmin fərqli dalğasında daha çox baxış toplasın. Threads və Instagram-da eyni zarafatların, eyni formatların təkrar-təkrar paylaşılması bunun açıq nümunəsidir. Hətta “səmimi” görünən məzmunun özü belə alqoritmə uyğun davranmaq üçün mexaniki şəkildə istehsal olunur. Nəticədə, AI üçün ən asan əvəz olunacaq məzmun məhz bu proqnozlaşdırıla bilən, şablon insan məzmunu olacaq. Çünki AI-ın əsas işi də budur: mövcud məlumatlara əsaslanaraq təxmin etmək və təkrarlamaq.

    Instagram-ın əsas məqsədi istifadəçini tətbiqdə saxlamaqdırsa, miqdar həmişə keyfiyyətdən üstün olacaq. Real, səmimi və dərin məzmun isə həm bahalı, həm də davamlı istehsalı çətin olan bir prosesdir. Əgər Instagram yaradıcıları həqiqətən fərqli və orijinal məzmun istehsalına təşviq edəcək yeni mexanizmlər tapmasa, platformada “süni” məzmunun artması qaçılmazdır. İstər insan tərəfindən, istərsə də AI ilə yaradılmış olsun...