Instagram rəhbəri məhkəmədə: “Komandamdan heç vaxt məlumat gizlətməyi istəməmişəm”

    Instagram rəhbəri Adam Mosseri Meta-ya qarşı davam edən sosial media asılılığı məhkəməsində ifadə verib. Məhkəmədə üzə çıxan daxili sənədlərə görə, Instagram əməkdaşlarına yeniyetmələrin təhlükəsizliyi ilə bağlı bəzi statistik məlumatların Mosseriyə təqdim edilməməsi tapşırılıb. Mosseri isə belə bir göstərişdən xəbərsiz olduğunu bildirib. ABŞ-nin onlarla ştatının baş prokurorlarının Meta-ya qarşı qaldırdığı məhkəmə işində şirkət uşaqları və yeniyetmələri platformalarından daha çox istifadə etməyə təşviq etməkdə ittiham olunur. İddiaçılar bildirirlər ki, Meta öz daxili araşdırmalarından platformalarının gənc istifadəçilərə mənfi təsir göstərə biləcəyini bilsə də, onların tətbiqlərdən asılılığını artıran mexanizmləri davam etdirib.

    Məhkəmədə əsas diqqətçəkən sənədlərdən biri Instagram əməkdaşlarının 2023-cü ildə hazırladığı yeniyetmələrin təhlükəsizliyi ilə bağlı təqdimat olub. Bundan başqa, Instagram-ın yeniyetmələrə tövsiyə edilməsini uyğun hesab etmədiyi məzmunların da yeniyetmələr tərəfindən böyüklərlə müqayisədə 1,5 dəfə daha çox görüldüyü qeyd edilib. Lakin məhkəmədə təqdim olunan daxili yazışmalara əsasən, şirkətin hüquqşünaslarından biri əməkdaşlardan bu statistikaları təqdimatdan çıxarmağı istəyib. Səbəb kimi Mosserinin bu məlumatlara “məruz qalmasının məhdudlaşdırılması” göstərilib.

    Mosseri məhkəmədə bunun onun üçün yeni məlumat olduğunu bildirib. O, komandasından məlumatları gizlətməyi heç vaxt tələb etmədiyini və özünün hansı məlumatları görüb-görməməsi ilə bağlı müzakirədə iştirak etmədiyini deyib. Mosserinin sözlərinə görə, hüquqşünasların sənədləri nəzərdən keçirməsi onların düzgünlüyünü və hüquqi tələblərə uyğunluğunu yoxlamaq məqsədi daşıya bilər. Instagram-ın məhsul dizaynı direktoru Francesco Fogu isə daha əvvəl verdiyi ifadədə rəhbərlikdən məlumatların gizlədilməsi ilə bağlı göstərişin onu təəccübləndirdiyini bildirib. Bununla belə, Fogu həmin məlumatların rəhbərliyə şifahi şəkildə çatdırılmasına icazə verildiyini və statistikaların təqdimatda yerləşdirilən digər hesabatlarda da mövcud olduğunu deyib.

    Məhkəmədə Instagram-ın istifadəçilərə tətbiqdən fasilə verməyi xatırladan “Take a Break” funksiyası da müzakirə olunub. Meta-nın məlumatlarına görə, funksiya 2021-ci ildə istifadəyə verildikdən sonra ilkin mərhələdə Instagram istifadəçilərinin cəmi 1,8 %-i onu aktivləşdirib. Meta-nın keçmiş data mütəxəssisi George Volichenko isə yeniyetmələr arasında göstəricinin daha aşağı olduğunu bildirib. Onun sözlərinə görə, ilkin məlumatlarda yeniyetmələrin yalnız 0,165 %-i Instagram-dan 10 dəqiqəlik fasilə vermək seçimini aktivləşdirib. Sonradan bu göstərici təxminən 0,2 %-ə yüksəlib. Mosseri funksiyanın istifadəsinin aşağı olduğunu qəbul etsə də, Instagram-ın yeniyetmələrin təhlükəsizliyi üçün daha geniş tədbirlər gördüyünü vurğulayıb. O, 16 yaşdan aşağı istifadəçilər üçün nəzərdə tutulan yeniyetmə hesablarında vaxt məhdudiyyətlərinin standart olaraq aktiv olduğunu qeyd edib.