Instagram uzun videoları televizora uyğunlaşdıran formatı sınaqdan keçirir

    “Instagram” uzun və üfüqi videolar üçün “Features” adlı yeni formatı sınaqdan keçirir. Məqsəd uzun videoları televizorda izləməyə daha uyğun göstərməkdir. “Features” hazırda ABŞ bazarında kiçik istifadəçi qrupu arasında yoxlanılır. Format həmçinin Braziliyada bəzi kontent yaradıcıları ilə sınaqdan keçirilir.

    “Instagram” rəhbəri Adam Mosseri uzun videoların platformaya əlavə olunmasına uzun müddət qarşı çıxdığını deyib. Onun 6,5 dəqiqəlik videolarla bağlı əsas narahatlığı dostlar arasındakı əlaqənin zəifləməsidir. Mosseriyə görə, istifadəçi uzun videoya daha çox vaxt ayırdıqda dostuna göndərə biləcəyi “Reels” çarxlarını, fotoları və karusel paylaşımlarını daha az görür. Nəticədə bəyənmə və paylaşmaların sayı azala bilər.

    Komanda indi qısa və uzun videoların bir-birini tamamlaması üzərində işləyir. Məsələn, podkastın və ya komediya proqramının tam versiyası uzun video kimi yayımlana bilər. Onun ayrı-ayrı hissələrini də qısa çarxlara bölmək olar. “Instagram” uzun videoya keçid verən qısa parçaları və yaradıcıların ardıcıl “Reels” seriyaları hazırlamasını da yoxlayır. Canlı yayımları daha asan tapmaq üçün də dəyişikliklər hazırlanır.

    Yeni format “Instagram” televiziya tətbiqinin ötən ilin sonunda çıxmasından sonra elan olunub. Tətbiq əvvəlcə ABŞ bazarında “Amazon Fire TV” cihazlarında “Reels” izləmək üçün sınaqdan keçirilib. Sonradan “Google TV”, “Samsung TV” və “Apple TV” cihazlarına da əlavə edilib. Bu ilin əvvəlində televiziya tətbiqində “Stories” izləmək funksiyası açılıb.