İrlandiya sosial şəbəkələr üçün yaş yoxlayan rəqəmsal cüzdan hazırlayır

    Technote.az “Engadget” platformasına istinadən bildirir ki, İrlandiya hökuməti sosial şəbəkə istifadəçilərinin yaşını təsdiqləmək üçün nəzərdə tutulmuş yeni Government Digital Wallet sistemini test etməyə başlayıb. Bu rəqəmsal cüzdan vasitəsilə istifadəçilər doğum haqqında şəhadətnamə, sürücülük vəsiqəsi, Avropa sağlamlıq kartı kimi rəsmi sənədlərin rəqəmsal versiyalarını telefonlarında saxlaya biləcəklər.

    Yeni sistemin əsas məqsədlərindən biri sosial media platformalarına giriş zamanı istifadəçilərin yaşını təhlükəsiz şəkildə təsdiqləməkdir. İrlandiya hökumətinin açıqlamasına görə, bu mexanizm xüsusilə uşaqları və yeniyetmələri internetdə zərərli məzmundan qorumaq üçün tətbiq ediləcək.

    Hazırda layihə pilot mərhələsindədir və könüllü istifadəçilər tərəfindən test olunur. Hökumət bu mərhələdə istifadəçi rəylərini toplayaraq sistemi daha funksional və istifadəçi dostu etməyi planlaşdırır. Rəqəmsal cüzdanın geniş istifadəyə verilməsi tarixinin dəqiq vaxtı açıqlanmasa da, İrlandiya Avropa İttifaqının tələbinə əsasən 2026-cı ilin sonuna qədər belə bir rəqəmsal cüzdan sistemi yaratmalıdır.