Kanada TikTok-un fəaliyyətini dayandırmaq qərarından dönüb

    Technote.az “Engadget” platformasına istinadən bildirir ki, TikTok Kanadadakı ofislərini bağlamayacaq. Ölkənin Sənaye naziri Melani Joli bildirib ki, milli təhlükəsizlik araşdırmasından sonra platformanın fəaliyyətini davam etdirməsinə icazə verilib. Qərar şirkətin məlumat təhlükəsizliyi və nəzarət mexanizmlərini gücləndirməsi şərti ilə qəbul olunub.

    Xatırladaq ki, Kanada hökuməti 2024-cü ildə ByteDance ilə əlaqələrini əsas gətirərək və “milli təhlükəsizlik riskləri” səbəbindən platformanın ölkədə fəaliyyətini dayandırmağı əmr etmişdi. Həmin qərarın ölkənin təhlükəsizlik və kəşfiyyat qurumlarının topladığı məlumatlara əsaslandığı bildirilirdi.

    Yeni razılaşmaya əsasən, TikTok Kanadada fəaliyyətini davam etdirmək üçün əlavə təhlükəsizlik tədbirləri tətbiq etməlidir. Şirkət istifadəçi məlumatlarının icazəsiz girişdən qorunması üçün məxfilik texnologiyalarını gücləndirəcək, azyaşlı istifadəçilər üçün əlavə qoruma mexanizmləri yaradacaq və məlumatlara giriş nəzarətinin müstəqil üçüncü tərəf tərəfindən mütəmadi audit olunmasına imkan verəcək.

    Nazir Melani Joli bildirib ki, qərar həm milli maraqların qorunmasına, həm də ölkədə iş yerlərinin saxlanmasına xidmət edir. Onun sözlərinə görə, TikTok-un Kanadada fiziki mövcudluğu davam edəcək, platforma yerli kontent yaradıcılarını, sənətçiləri və mədəni təşkilatları dəstəkləyəcək, həmçinin rəsmi və yerli dillərdə Kanada mədəni məzmununun istehsalını və əlçatanlığını artıracaq.