LinkedIn profil təsdiqlənməsində sürətli artım baş verib
Sosial Media
19.12.2025
Sevinc
Technote.az “TechCrunch” platformasına istinadən bildirir ki, Rəqəmsal platformalarda etibarlılıq və autentiklik məsələləri daha da ön plana çıxarkən, LinkedIn profil təsdiqlənməsi (verification) mexanizmini sürətlə genişləndirir. 2025-ci ildə bu sahədə ən sürətli artım məhz Hindistanda qeydə alınıb.
LinkedIn-in etibar məhsulları üzrə vitse-prezidenti Oskar Rodrigezin sözlərinə görə, platformada hər il təxminən 30 milyon yeni təsdiqləmə əlavə olunur. 2025-ci ildə isə profil təsdiqlənməsinin illik artım tempi 38 %-dən çox olub. Bu artım ötən həftə açıqlanan və 100 milyondan çox istifadəçinin ən azı bir təsdiqləməyə sahib olduğunu göstərən statistikadan sonra daha da diqqət çəkib. LinkedIn profil təsdiqlənməsini ilk dəfə 2022-ci ildə tətbiq etməyə başlayıb. Əvvəlcə iş yeri və şəxsiyyətin təsdiqlənməsi ilə məhdudlaşan bu sistem daha sonra dövlət tərəfindən verilən şəxsiyyət sənədləri, eləcə də şirkət səhifələri və vakansiya elanları üçün də genişləndirilib.
Məlumata görə, təsdiqlənmiş istifadəçilərin əksəriyyəti şəxsi identifikasiya yox, iş yeri əlaqəsinin təsdiqlənməsini seçir. Statistikaya əsasən:
- Təxminən 60 % istifadəçi şirkət e-poçtu vasitəsilə iş yerini təsdiqləyib
- 27 % isə dövlət tərəfindən verilən şəxsiyyət sənədi ilə identifikasiya olunub
Coğrafi baxımdan ən çox təsdiqlənmiş istifadəçi hələ də ABŞ-nin payına düşür. Bununla belə, Hindistan son 12 ayda 80%-lik artım ilə LinkedIn-in ən sürətlə böyüyən təsdiqləmə bazarına çevrilib. Böyük Britaniya, Kanada, Braziliya və Fransa da əsas bazarlar sırasındadır.
Hazırda Hindistanda 160 milyondan çox LinkedIn istifadəçisi var və bu artım peşəkar şəbəkələşmə, işə qəbul və distant iş imkanlarının genişlənməsi ilə paralel gedir. LinkedIn təsdiqləmə nişanlarını artıq platformadan kənara da çıxarır. Şirkət bu il “Verified on LinkedIn” proqramını işə salaraq, digər platformalara da LinkedIn təsdiqləmə nişanlarını inteqrasiya etməyə imkan yaradıb. Son tərəfdaşlardan biri Zoom olub. Daha əvvəl isə Adobe və G2 bu siyahıya daxil idi. Bundan əlavə, yeni self-service API vasitəsilə digər şirkətlər də bu sistemi öz xidmətlərinə qoşa bilirlər.
LinkedIn-in məlumatına görə, təsdiqlənmiş profillər:
- 60 %-ə qədər daha çox profil baxışı
- Təxminən 50 % daha yüksək paylaşıma reaksiya
- Şirkət səhifələri üçün isə daha sürətli izləyici artımı yaradır
Rodriguez bildirir ki, təsdiqləmə LinkedIn-də real insanları və etibarlı iş elanlarını ön plana çıxaran güclü etibar siqnalıdır.
Paylaş
