Mark Zuckerberg'in ABŞ Konqressindəki çıxışından maraqlı məqamlar
11.04.2018
Farid Pardashunas
10 Apreldən 11 Aprelə keçən gecə Facebook şirkətinin təsisçisi
Mark Zuckerberg ABŞ Konqressinin qarşısında çıxış etdi. Çıxışın əsas səbəbi 87
milyon Facebook istifadəçisinin məlumatlarının Cambridge Analytica şirkəti tərəfindən
yığılaraq siyasi reklamların yaradılmasında istifadəsi olub. Ticarət üzrə
komitetin, hüquq şöbəsinin və elmi komitetin təmsilçiləri Facebook alqoritmlərindən
və onun iş prinsipindən suallar veriblər. Biz isə həmin çıxışdan olan maraqlı məqamları
sizlər üçün təqdim edirik.
Facebook sosial şəbəkələr arasında monopolistdir
Senator Lindsey Graham, Zuckerberg-dən servisin hansı əsas rəqibə
sahib olduğunu soruşub. Zuckerberg isə bu suala heç cür cavab verə bilməyib. O
öz çıxışında bir neçə dəfə qeyd edib ki, Facebook çox böyük şirkətdir. Lakin
senatorlar soruşublar ki, o həddindən artıq böyük deyilmi? Görünür, senator
şirkətin bu sahədə monopoliyası ilə mübarizə aparmaq niyyətindədir. Lakin çətin
ki, onun öncədən qurulmuş bir strategiyası olsun.
Zuckerberg Facebook-un ödənişli versiyasının istifadəyə verilməsini istisna etmir
Senatorların şirkətin biznes modeli və istifadəçilərin
konfidensial məlumatlarının qorunması barədə suallarına cavab verərkən Zuckerberg
qeyd edib ki, Facebook-un pulsuz versiyası hər zaman mövcud olacaq. Bununla
yanaşı o, sosial şəbəkənin ödənişli versiyasının olacağını da istisna etmir.
Sosial şəbəkələrin gələcəyi süni zəka texnologiyaları ilə bağlıdır
Zuckerberg öz çıxışında qeyd edib ki, gələcəkdə Facebook
süni zəka texnologiyasının yaradılmasına üstünlük verəcək. Sosial şəbəkənin təkmilləşdirilməsi
barəsindəki suallara cavab verərkən Zuckerberg qeyd edib ki, şirkət artıq
siyasi fake xəbərləri yayan və terrorçuluğa çağırışlar edən fake hesabları
axtarıb tapan süni zəka texnologiyasından istifadə edir. Növbəti 5-10 ildə şirkət
onu avtomatlaşdırılmış axtarış səviyyəsinə çatdırmağı planlaşdırır.
Sosial şəbəkədəki kontentə 20.000 nəfər nəzarət edəcək
Əgər botları süni zəka axtarırsa, mətnlərə nəzarət insanların
öhdəliyində qalacaq. Facebook şirkəti kontentin analizi üçün nəzərdə tutulmuş
şöbəsini 20.000 nəfər yeni işçi ilə genişləndirməyi planlaşdırır. İnsanlar
hansısa kontentə şikayətlərini bildirdikdə məhz bu işçilər həmin kontentin sosial
şəbəkədə qalıb-qalmayacağına qərar verirlər. Bununla belə həmin işçilər müxtəlif
siyasi baxışlara sahibdirlər. Lakin bu siyasi baxışların bir-birilərindən nə dərəcədə
fərqləndiyi bilinmir. Belə ki, Zuckerberg-in sözlərinə əsasən şirkət öz
işçilərindən prezident seçkiləri zamanı onların hansı namizədlərə səs verdiklərini
soruşmur.
Amerika hökuməti Facebook-un necə çalışdığını bilmir
Zuckerberg-in çıxışı zamanı senatorlar ondan məlumatların
yığılması üsulu və onların analizi barəsində çoxlu suallar veriblər. Şirkət bu
məlumatları nə qədər müddət saxlayır, kimlərə təqdim edir, istifadəçilər öz məlumatlarının
gizlilik səviyyələrini idarə edə bilərlərmi və s. Bir çox jurnalistlərin sözlərinə
əsasən senatorlar bu sualları məmur kimi deyil adi sosial şəbəkə istifadəçisi
kimi veriblər. Yəni onlar öz Facebook hesablarının ana səhifələrində bu və ya
digər xəbərin hansı səbəbə görə göründüyünü anlamırlar.
Linki kopyala
Həftənin xəbərləri
Whatsapp yaxın zamanda 2 yeni funksiyanı əldə edəcək
Qutusu açılmamış birinci nəsil iPhone modeli 15 Pro Max-dan təxminən 80 qat baha qiymətə satılıb!