Meta AI artıq Facebook profil şəkillərini hərəkətə gətirir

    Technote.az “Mashable” platformasına istinadən bildirir ki, Meta şirkəti Facebook platformasında yeni süni intellekt əsaslı funksiyanı istifadəyə verib. Artıq istifadəçilər profil şəkillərini Meta AI vasitəsilə animasiya edə biləcəklər.

    Yeni funksiya sayəsində adi, statik bir foto bir neçə saniyə ərzində hərəkətli, GIF-ə bənzər animasiyaya çevrilir. İstifadəçilər əvvəlcədən hazırlanmış animasiya effektləri arasından seçim edə bilərlər. Mövcud seçimlərə “natural”, “party hat”, “confetti”, “wave” və “heart” kimi effektlər daxildir. Meta bildirir ki, il ərzində mövsümi və xüsusi günlər üçün əlavə animasiya variantları da təqdim olunacaq.

    Şirkətin açıqlamasına görə, ən yaxşı nəticə üçün fotoda bir nəfər kameraya baxan şəkildə, üzü aydın görünən halda olmalıdır və əlində əlavə obyekt olmaması tövsiyə edilir. İstifadəçilər animasiya etmək üçün ya telefonlarının qalereyasındakı şəkilləri, ya da artıq Facebook-a yüklədikləri fotoları seçə bilərlər. Animasiya edilmiş şəkil həm profil səhifəsində görünəcək, həm də “Feed” bölməsində paylaşmaq mümkün olacaq.