Meta Facebook-da “AI Mode” funksiyasını istifadəyə verdi

    Meta şirkəti Facebook platformasında süni intellekt əsaslı yeni funksiyalarını istifadəyə verib. Şirkətin əsas yeniliyi olan “AI Mode” istifadəçilərə Facebook daxilində məlumat axtarışını daha sürətli və interaktiv şəkildə həyata keçirməyə imkan verir. Yeni sistem adi axtarış nəticələrini göstərmək əvəzinə, Meta AI vasitəsilə Facebook-da yerləşdirilmiş ictimai paylaşımlar, Qruplar və Reels məzmunu əsasında istifadəçinin sualına ümumiləşdirilmiş cavab hazırlayır. Beləliklə, insanlar uzun siyahılar arasında gəzmək əvəzinə suallarını təbii dildə verərək birbaşa cavab əldə edə biləcəklər.

    Bu yenilik Meta-nın ötən ay istifadəyə verdiyi Reddit-ə bənzər “Forum” tətbiqindəki “Ask” bölməsinin davamı kimi qiymətləndirilir. Həmin sistem də Facebook qruplarında aparılan müzakirələrdən istifadə edərək suallara cavab hazırlayır. Bununla yanaşı, Meta AI tərəfindən yaradılan cavabların etibarlılığı ilə bağlı müəyyən narahatlıqlar da mövcuddur. Çünki cavablar ekspert və ya rəsmi mənbələrdən deyil, əsasən adi istifadəçilərin paylaşımlarından formalaşdırılır. Bu isə köhnəlmiş və ya yanlış məlumatların süni intellekt tərəfindən ümumiləşdirilərək təqdim olunması riskini artırır.

    Şirkət eyni zamanda Facebook üçün yeni AI əsaslı şəkil və video redaktə alətlərini də təqdim edib. İstifadəçilər artıq kollajlarda obyektləri ayıra, keçid effektləri əlavə edə və süni intellekt vasitəsilə geyim, saç düzümü və aksesuarlarını virtual şəkildə dəyişə biləcəklər. Məsələn, idman azarkeşləri “AI Edit” funksiyası vasitəsilə sevimli komandalarının formasını virtual olaraq üzərlərində sınaya və ya profil şəkillərini AI ilə yenidən tərtib edə bilərlər.

    Meta son aylarda Facebook-a bir sıra AI yenilikləri əlavə edib. Bunlara animasiyalı profil şəkilləri, Marketplace-də alıcı mesajlarına avtomatik cavab verən süni intellekt və kontent yaradıcıları üçün paylaşım vaxtı və auditoriya analizi təklif edən AI köməkçisi daxildir.