Meta istifadəçilərin süni intellektlə çatlarını reklamın fərdiləşdirilməsi üçün istifadə edəcək

     Meta şirkəti 16 dekabrdan etibarən istifadəçilərin süni intellekt köməkçisi ilə mətn və səsli dialoqlarını sosial şəbəkələrdə reklam və kontentin fərdiləşdirilməsi üçün istifadə etməyə başlayacaq. Yenilik dünyanın əksər regionlarını əhatə edəcək, lakin Böyük Britaniya, Avropa Birliyi ölkələri və Cənubi Koreyada bütün məsələlər həmin yurisdiksiyalarda həll olunana qədər tətbiq təxirə salınıb. Məlumata görə, Meta yeni məlumat toplama metodunu din, şəxsi münasibətlərdə orientasiya, siyasi baxışlar, sağlamlıq, irqi və ya etnik mənsubiyyət, fəlsəfi inanclar və həmkarlar ittifaqlarına üzvlük kimi məxfi mövzulara aid olan söhbətlərə tətbiq etməyəcək.

     Meta-nın məxfilik şöbəsinin rəhbəri Christy Harris izah edib ki, şirkətdə istifadəçilərin həssas hesab edə biləcəyi məlumatların işlənməsi ilə bağlı müəyyən edilmiş qaydalar mövcuddur - bu siyasətlər tam şəkildə qüvvədə qalacaq və gələcəkdə də tətbiq olunmağa davam edəcək. O həmçinin əlavə edib ki, şirkətin süni intellekt dialoqlarının şifrələnməsinə yanaşması bu yeniləmə çərçivəsində dəyişməyəcək. Bundan başqa, istifadəçilər hələ də parametrlər menyusunda reklam üstünlüklərini tənzimləyə biləcəklər, lakin fərdiləşdirmədən imtina etmək imkanı olmayacaq. Facebook, Instagram və ya WhatsApp hesablarını Meta hesab mərkəzində birləşdirən istifadəçilər üçün şirkət bir platformada çat-botla qarşılıqlı əlaqəyə əsaslanan məlumatlardan digər platformada reklam və ya tövsiyələrin göstərilməsi üçün istifadə edə bilər. Bu, WhatsApp və Messenger-də Meta AI xidməti ilə aparılan şəxsi dialoqlara da aiddir.