Meta sosial təsirlərlə bağlı araşdırma yanaşmasını dəyişə bilər

    Technote.az “The Verge” platformasına istinadən bildirir ki, Meta-nın baş direktoru Mark Zuckerberg 2021-ci ildə şirkətin sosial məsələlər üzrə apardığı daxili araşdırmaların Meta-nı ictimai və hüquqi problemlərlə üz-üzə qoymasından sonra bu araşdırma yanaşmasının dəyişdirilib-dəyişdirilməməsini müzakirə edib.

    Bu barədə məlumat The Wall Street Journal-ın Instagram-ın yeniyetmə qızların psixoloji vəziyyətinə mənfi təsiri ilə bağlı araşdırmanı dərc etməsindən bir gün sonra Zuckerberg-in yüksək vəzifəli rəhbərlərə göndərdiyi e-poçtdan məlum olub. Həmin araşdırmada qeyd edilirdi ki, yeniyetmə qızların 32 faizi bədənləri ilə bağlı özlərini pis hiss etdikləri zaman Instagram vəziyyəti daha da ağırlaşdırır.

    Sözügedən sənədlər sonradan ifşaçı Francis Haugen tərəfindən mediaya ötürülmüşdü. E-poçt isə Nyu-Meksiko ştatının baş prokuroru Raul Torrez tərəfindən Meta-ya qarşı qaldırılmış məhkəmə işi çərçivəsində ictimaiyyətə açıqlanıb. İddiada Meta-nın məhsullarını yeniyetmələr üçün “təhlükəsiz” kimi təqdim etməsinə baxmayaraq, zərərli dizayn qərarlarından xəbərdar olduğu vurğulanır.

    Zuckerberg e-poçtda rəqib şirkətlərin bu tip tənqidlərdən yayınmaq üçün daha az araşdırma apardığını bildirib. O, xüsusilə Apple-ın yanaşmasını misal çəkərək qeyd edib ki, Apple bu mövzular üzrə geniş daxili araşdırmalar aparmadığı üçün ictimai təzyiqlə daha az üzləşir. Zuckerberg-in fikrincə, Meta-nın uşaq istismarı materialları (CSAM) ilə bağlı daha çox hesabat verməsi də şirkətin üzərinə əlavə tənqidlər çəkir.