Nepalda kütləvi etirazlardan sonra sosial media platformalarının bloklanması aradan qaldırılıb

     Nepal hakimiyyəti ən azı 19 nəfərin həlak olduğu kütləvi etirazlardan sonra əvvəl tətbiq edilmiş bir sıra sosial servislərə qoyulan bloklamanı ləğv etmək qərarına gəlib. Məhdudiyyətlər Facebook, X, Instagram və YouTube də daxil olmaqla 26 platformanı əhatə edirdi. 25 avqustda Nepal hökuməti xarici sosial şəbəkələrdən və servislərdən ölkədə yerli nümayəndəlik açmağı tələb etmişdi. Bunun üçün onlara 7 gün vaxt verilmişdi. Viber və TikTok kimi bəzi platformalar bu tələbi yerinə yetirsələr də, əksəriyyəti etməmiş və nəticədə bloklamaya məruz qalmışdı. 8 sentyabr, bazar ertəsi günü isə minlərlə gənc, o cümlədən məktəblilər küçələrə çıxaraq sosial şəbəkələrə çıxışın bərpasını tələb ediblər.

     Yerli KİV-in məlumatına görə, bu etirazlar polislə toqquşmaya çevrilib və nəticədə polis atəş açıb. 19 nəfərin öldüyü, 100-dən çox insanın isə yaralandığı məlumdur. Həmin günün axşamı Nepalın rabitə və informasiya naziri Prithvi Subba Gurung jurnalistlərə açıqlamasında hökumətin ictimai narazılığa cavab olaraq bütün servislərə qoyulan bloklamanı ləğv etdiyini bildirib. Daha sonra ölkənin baş naziri Khadga Oli bəyan edib ki, etirazlar bəzi elementlərin müdaxiləsi səbəbindən zorakı xarakter alıb, halbuki hakimiyyət heç vaxt yeni nəslin tələblərinə qarşı çıxmayıb. Beynəlxalq insan haqları təşkilatları artıq Nepal hökumətinin hərəkətlərindən narahatlıqlarını ifadə ediblər. BMT-nin İnsan Hüquqları üzrə Ali Komissarlığının idarəsi ölkə hakimiyyətini sülh yolu ilə toplaşmaq və fikir azadlığı hüququnu təmin etməyə çağırıb.