Pavel Durov hansı halda Telegram-ı bağlayacağını açıqlayıb

     Telegram mesajlaşma xidmətinin mövcud olduğu bütün tarix boyu istifadəçilərin şəxsi mesajlarından bir bayt belə açıqlanmayıb. Bu barədə servisin qurucusu Pavel Durov bəyan edib. O həmçinin əlavə edib ki, platforma Avropa Birliyində qüvvədə olan qanunvericiliyə əməl edir və etibarlı məhkəmə qərarı olduqda yalnız cinayətdə şübhəli bilinən şəxslərin IP ünvanlarını və telefon nömrələrini açıqlayır. “Telegram, şifrələməni zəiflədən backdoor yerləşdirmək və əsas insan hüquqlarını pozmaq əvəzinə, bazarı tərk etməyi üstün tutar” - deyə Durov əlavə edib.

     Xatırladaq ki, Pavel Durov 2024-cü il avqustun 24-də Fransanın Le-Bourget hava limanında saxlanılmışdı. Yerli hakimiyyət orqanları onu qeyri-qanuni tranzaksiyaların həyata keçirilməsi üçün onlayn platformanın idarə olunmasında iştirak, səlahiyyətli orqanların sorğularına cavab olaraq məlumat və sənədlərin təqdimindən imtina, çirkli pulların yuyulması və digər ittihamlarla günahlandırmışdılar. Bir neçə gün sonra Durov məhkəmə nəzarəti ilə azadlığa buraxıldı və ondan 5 milyon avro girov qoyulması tələb olundu.

     2024-cü ilin payızında məlum oldu ki, Telegram Fransa hüquq-mühafizə orqanlarının sorğularına cavab olaraq istifadəçilərin IP ünvanlarını və telefon nömrələrini əvvəlkindən xeyli daha tez-tez açıqlamağa başlayıb. Əgər ilin birinci rübündə bu cəmi 17 istifadəçiyə aid idisə, üçüncü rübdə artıq 632 istifadəçiyə dair məlumat açıqlanıb. Bu ilin fevralında Fransa prokurorluğunun nümayəndəsi bildirib ki, Durov-la bağlı iş məhkəməyə ən tez 1 ildən sonra çatacaq.