Pinterest CEO-su: “Axtarış həcmi üzrə ChatGPT-ni keçirik”

 

    Technote.az “TechCrunch” platformasına istinadən bildirir ki, Pinterest zəif dördüncü rüb maliyyə nəticələri açıqlasa da, şirkət rəhbərliyi platformanın qlobal axtarış bazarında hələ də güclü mövqedə olduğunu iddia edir. Şirkətin baş direktoru Bill Ready investorlarla görüş zamanı Pinterest-in aylıq axtarış həcminin ChatGPT-dən daha çox olduğunu bildirib.

    Ready-nin sözlərinə görə, ChatGPT ayda təxminən 75 milyard axtarış sorğusu qəbul etdiyi halda, Pinterest-də bu rəqəm 80 milyarda çatır və platforma aylıq 1,7 milyard klik yaradır. CEO vurğulayıb ki, bu axtarışların yarıdan çoxu kommersiya xarakterlidir. Onun iddiasına əsasən, ChatGPT-də kommersiya məqsədli sorğular ümumi axtarışların təxminən 2 %-ni təşkil edir.

    Bununla belə, maliyyə nəticələri investorları qane etməyib. Pinterest dördüncü rübdə 1,32 milyard dollar gəlir əldə edib ki, bu da gözlənilən 1,33 milyard dollardan azdır. Səhm üzrə qazanc isə 69 sent proqnoza qarşı 67 sent olub. Şirkət həmçinin 2026-cı ilin birinci rübü üçün gəlirin 951–971 milyon dollar arasında olacağını proqnozlaşdırıb ki, bu da bazar gözləntilərindən aşağıdır.

    Şirkət zəif nəticələri əsasən iri reklamverənlərin, xüsusilə Avropada, reklam xərclərini azaltması ilə izah edib. Bundan əlavə, oktyabr ayında tətbiq edilən yeni mebel tarifləri “home” kateqoriyasında problemlər yaradıb və bu tendensiyanın növbəti rübdə də davam edə biləcəyi qeyd olunub.