Reddit-dəki r/opensource icması AI işlədən layihələri qəbul etməyəcək

    “Reddit”də açıq mənbəli layihələrə aid “r/opensource” icmasının moderatorları paylaşım qaydalarını dəyişiblər. Artıq süni intellektdən (AI) yararlanan, onunla hazırlanan və ya AI üçün yaradılan layihələr qəbul edilməyəcək. Moderatorların fikrincə, indiki AI texnologiyaları icmanın prinsiplərinə uyğun deyil. Qərar üzvlər arasında ciddi narazılıq yaradıb.

    Moderator “Wolvereness” deyib ki, qaydalar bəzi hallarda fərqli tətbiq oluna bilər. Məsələn, avtomatik altyazı kimi əlçatanlıq funksiyalarında AI-dan yararlanan proqramlara istisna edilə bilər. Lakin üzvlər qadağanın həddən artıq geniş və qeyri-müəyyən olduğunu düşünürlər. Tənqidçilər xatırladıblar ki, “Linux” nüvəsində, yəni sistemin əsas hissəsində AI ilə yaradılmış kod da var. Beləliklə, həmin nüvədən yararlanan layihələr də qadağaya düşə bilər.

    Yeni qaydalar yalnız AI layihələrinə aid deyil. Paylaşılacaq layihələr ən azı 1 illik olmalı, aktiv saxlanmalı və bir neçə iştirakçı tərəfindən hazırlanmalıdır. Bu qayda yeni layihəsini tanıtmaq və dəstək tapmaq istəyən tək proqramçıları kənarda qoya bilər. Moderatorlar layihə üçün texniki məsul şəxs və ya iştirakçı axtaran paylaşımları da qəbul etməyəcəklər.

    Qaydalar ingilis dilində danışmayan üzvlərin iştirakını da məhdudlaşdırır. Moderatorlar AI ilə yazılan mətnləri süni intellektlə tərcümə olunanlardan ayıra bilmədiklərini deyirlər. Onların fikrincə, ingilis dilini bilməyən şəxs tərcümənin düzgün olub-olmadığını özü yoxlaya bilməz. Etirazlardan sonra “r/trueopensource” adlı alternativ icma yaradılıb.