Reddit istifadəçiləri artıq şərhlərə video əlavə edə biləcək

    Reddit platforması istifadəçilər üçün yeni funksiyanı istifadəyə verib. Artıq istənilən Reddit istifadəçisi dəstəklənən icmalarda paylaşımlara mətn, şəkil və GIF-lərlə yanaşı, video formatında da şərh yaza biləcək. Yeni funksiya sayəsində şərh bölməsində yerləşən video işarəsinə toxunaraq həm cihazda saxlanılan videonu yükləmək, həm də birbaşa tətbiq daxilində yeni video çəkmək mümkün olacaq. Şirkətin açıqlamasına görə, videolar avtomatik şəkildə oynadılmayacaq və paylaşılmadan əvvəl Reddit-in təhlükəsizlik sistemləri tərəfindən yoxlanılacaq.

    Video şərhlər yalnız ictimai və iş mühiti üçün uyğun kimi qeyd olunan icmalarda aktiv olacaq. Bununla yanaşı, videonun mütləq istifadəçinin özü tərəfindən çəkilməsi tələb olunmur. Bu isə funksiyanın müxtəlif memlər, reaksiyalar və yaradıcı cavablar üçün də istifadə olunacağına işarə edir. Reddit-in Məhsul Direktoru Maria Angelidou-Smith bildirib ki, yeni imkan platformada daha canlı və səmimi ünsiyyət yaratmaq məqsədi daşıyır və istifadəçilərə sevdikləri icmalarda öz fikirlərini daha yaradıcı formada ifadə etməyə şərait yaradır.