Reddit rekord nəticələr açıqladı

    Reddit güclü maliyyə nəticələri açıqlasa da, süni intellekt şirkətin gələcək trafik artımı ilə bağlı investorları narahat edib. Şirkət ikinci rübdə 805 milyon dollar gəlir əldə edib. Bu, ötən ilin eyni dövrü ilə müqayisədə 61 % artım deməkdir. Reddit-in xalis mənfəəti isə 183 % artaraq 253 milyon dollara çatıb. Hər iki göstərici analitiklərin gözləntilərini üstələyib.

    Reddit növbəti rüb üçün də nikbin proqnoz verib. Şirkət gəlirlərinin 860–870 milyon dollar arasında olacağını gözləyir ki, bu da bazar proqnozlarından yüksəkdir. Bütün bunlara baxmayaraq, Reddit səhmləri hesabatdan sonra birjadankənar ticarətdə 10 %-dən çox ucuzlaşıb. Bunun əsas səbəblərindən biri CEO Steve Huffmanın axtarış sistemlərindən Reddit-ə gələn trafikin rüb ərzində qeyri-sabit olduğunu açıqlaması olub. İnvestorların əsas narahatlığı Google kimi axtarış sistemlərində süni intellekt tərəfindən yaradılan cavabların geniş yayılmasıdır. İstifadəçi axtardığı məlumatı birbaşa AI xülasəsindən əldə etdikdə Reddit kimi saytlara keçid etməyə ehtiyac duymaya bilər. Bu isə Reddit-in Google-dan əldə etdiyi trafikin azalmasına səbəb ola bilər.