Snapchat yeni Quick Cut funksiyasını təqdim etdi

    Technote.az “The Verge” platformasına istinadən bildirir ki, Snapchat videoların hazırlanmasını daha da asanlaşdıran yeni Quick Cut alətini təqdim edib. Bu funksiya istifadəçilərə telefonlarında saxladıqları Memories və ya kamera qalereyasındakı şəkil və videolardan avtomatik, musiqi ilə sinxronlaşdırılmış qısa videolar yaratmağa imkan verir.

    Alət videoya avtomatik musiqi əlavə edir və kadrları ritmə uyğun şəkildə montajlayır. İstifadəçilər istəsələr, musiqini dəyişə və paylaşmadan öncə daha detallı redaktə alətlərindən də yararlana bilərlər. Yeni funksiya Snapchat tətbiqində bir neçə yerdən, o cümlədən Memories, kamera bölməsi və qalereyadan əlçatandır. İlk təəssüratlara görə, Quick Cut xüsusilə kontent yaradanlar və dostları üçün sürətli, əyləncəli videolar hazırlamaq istəyənlər üçün olduqca praktikdir.

    Quick Cut hazırda iOS cihazlarında istifadəyə verilib. Snap şirkəti funksiyanın yaxın zamanda Android cihazlar və tətbiqin digər bölmələri üçün də əlçatan olacağını bildirib.