Spotify ən sadiq dinləyicilərinə xüsusi bilet imkanı təqdim edəcək

    Spotify canlı konsert videolarının yayımı və eksklüziv bilet satışları istiqamətində yeni addımlar atır. Şirkət musiqi festivallarının canlı yayımlanması üçün təşkilatçılarla danışıqlar aparır və eyni zamanda dünyanın ən böyük konsert təşkilatçılarından biri olan Live Nation ilə çoxillik əməkdaşlıq müqaviləsi imzalayıb. Bloomberg-in məlumatına görə, Spotify gələcəkdə müxtəlif musiqi festivallarının canlı görüntülərini platformasında yayımlamaq hüququ əldə etməyə çalışır. Şirkət artıq bu istiqamətdə ilk addımları ataraq meksikalı dinləyicilər üçün Dua Lipa-nın Mexiko şəhərində keçirilən konsertindən görüntülər təqdim edib.

    Spotify-ın elan etdiyi ən diqqətçəkən yenilik isə "Reserved" adlı yeni xidmətidir. Bu yay ABŞ-də seçilmiş konsert turları ilə istifadəyə veriləcək sistem Spotify Premium abunəçiləri arasında ən sadiq dinləyicilərə üstünlük verəcək. Platforma istifadəçilərin müəyyən ifaçını nə qədər tez-tez dinlədiyini, onu nə qədər müddətdir izlədiyini və fəaliyyətin real istifadəçi davranışı olub-olmadığını analiz edərək superfanları müəyyənləşdirəcək.

    Seçilən istifadəçilər elektron poçt və tətbiqdaxili bildiriş vasitəsilə məlumatlandırılacaq və onlar ümumi satış başlamazdan əvvəl təxminən 24 saat ərzində iki bilet almaq hüququ əldə edəcəklər. Məlumata görə, Spotify bu eksklüziv bilet hüquqları üçün on milyonlarla dollar ödəyib və bununla Apple və Amazon kimi rəqiblərini geridə qoyaraq Live Nation ilə xüsusi əməkdaşlıq əldə edib.

    Şirkətin bu addımları son dövrlərdə videoya yönəlmiş strategiyasının bir hissəsidir. Spotify artıq musiqi videoları, video podkastlar və digər vizual məzmun növlərinə daha çox investisiya yatırır. Şirkətin baş direktoru Daniel Ek 2026-cı ilin Spotify üçün sadəcə musiqi platforması deyil, geniş media platformasına çevrilmə ili olacağını bildirib.