Spotify uşaqlar üçün idarə olunan hesabları pulsuz istifadəyə verdi

    Spotify valideyn nəzarəti ilə işləyən uşaq hesablarını daha geniş istifadəçi kütləsi üçün pulsuz istifadəyə açır. Şirkət bildirib ki, bundan sonra ABŞ, Böyük Britaniya, Avstraliya, Fransa, Almaniya və Niderlandda yaşayan istifadəçilər tarif planından asılı olmayaraq 13 yaşdan kiçik uşaqları üçün ayrıca idarə olunan (Managed Account) hesab yarada biləcəklər.

    Bu funksiya ilk dəfə ötən ilin oktyabrında yalnız Premium Family abunəçiləri üçün təqdim edilmişdi. İndi isə Spotify onu pulsuz istifadəçilər də daxil olmaqla bütün hesab növlərinə genişləndirir. Yaxın vaxtlarda Kanada, Yeni Zelandiya, Avropanın və Latın Amerikasının bir sıra ölkələrində də bu imkan istifadəyə veriləcək. İdarə olunan hesablar uşaqlara öz musiqi profillərinə sahib olmağa, fərdiləşdirilmiş musiqi tövsiyələri almağa və pleylistlər yaratmağa imkan verir. Bununla yanaşı, hesablar valideyn nəzarəti ilə idarə olunur və bir sıra təhlükəsizlik məhdudiyyətləri tətbiq edilir.

    Şirkət bildirir ki, uşaqların ayrıca hesabdan istifadə etməsi valideynlərin şəxsi musiqi tövsiyələrinin və illik Spotify Wrapped statistikasının daha dəqiq formalaşmasına da kömək edəcək.