Teams artıq LinkedIn rəhbərinə tapşırıldı

    Technote.az “The Verge” platformasına istinadən bildirir ki, Microsoft şirkətində böyük rəhbərlik dəyişiklikləri baş verir. Şirkətin həm Office, həm də LinkedIn bölməsinə rəhbərlik edən Ryan Roslansky artıq Microsoft Teams platformasına da cavabdeh olacaq. Bununla o, şirkətdə yeni yaradılan “Work Experiences Group” adlı bölmənin rəhbəri vəzifəsini icra edəcək.

    Bu dəyişikliklər Microsoft-un təcrübəli rəhbərlərindən biri olan Rajesh Jha-nın təqaüdə çıxmasından sonra həyata keçirilir. Jha 35 ildən artıq müddətdə Microsoft-da çalışıb və Windows, Office, Copilot, həmçinin Microsoft 365 komandalarına rəhbərlik edib. Şirkət isə onun səlahiyyətlərini müxtəlif rəhbərlər arasında bölüşdürməyə başlayıb.

    Yeni struktur çərçivəsində Microsoft daxilində sürətlə yüksələn rəhbərlərdən biri olan Charles Lamanna da daha geniş səlahiyyətlər əldə edib. O, artıq Copilot, AI agentləri və platformalar üzrə əsas komandaya rəhbərlik edəcək. Bu komandaya Microsoft 365 xidmətləri, Dynamics 365, BizChat və digər platformalar daxildir.

    Digər dəyişikliklərə əsasən, uzun illərdir Microsoft-da çalışan Jeff Teper və Kirk Koenigsbauer da Lamanna-ya tabe olacaqlar. Jeff Teper “apps and agents” bölməsinin icraçı vitse-prezidenti, Kirk Koenigsbauer isə “Data Platform and Growth” bölməsinin prezidenti olacaq. Windows və Surface cihazlarına rəhbərlik edən Pavan Davuluri isə öz mövqeyini qoruyub saxlayır. Maraqlı məqamlardan biri isə vaxtilə Word və Excel-in yaradılmasına rəhbərlik etmiş məşhur proqram mühəndisi Charles Simonyi-nin komandası olan Intentional Software bölməsinin də Davuluri-yə bağlanmasıdır.

    Microsoft-un daxili strukturunda baş verən bu dəyişikliklər şirkətin AI və məhsuldarlıq xidmətlərini daha sürətli inkişaf etdirmək strategiyasının bir hissəsi hesab olunur. Xüsusilə Copilot və Microsoft 365 xidmətlərinin gələcəkdə daha sıx inteqrasiya olunacağı gözlənilir. Bundan əlavə, Microsoft yaxın zamanda uzun illər şirkətdə çalışan əməkdaşlara könüllü təqaüd proqramı da təqdim etməyə hazırlaşır. Yaş və iş stajının cəmi 70 və daha çox olan ABŞ əməkdaşları bu proqramdan yararlana biləcəklər.