Telegram rəhbərliyi 2024-cü ildə apardığı genişmiqyaslı təmizləmə əməliyyatının detalları barədə məlumat yayıb. Məşhur mesajlaşma platforması bu il ərzində ümumilikdə 15.4 milyon kanal və qrupu zorakılığa təşviq, uşaq istismarı və qanunsuz malların ticarəti kimi mövzularda qadağan olunmuş məzmunlar paylaşdığı üçün bloklayıb. Telegram Moderasiyasına Ümumi Baxış adlı hesabatda qeyd olunur ki, "2015-ci ildən bəri moderasiya istifadəçi hesabatlarını maşın öyrənməsi ilə dəstəklənən proaktiv monitorinq ilə birləşdirir. 2024-cü ilin əvvəllərində bu səylər ən son süni intellekt moderasiya alətləri ilə daha da təkmilləşdirildi".

     Bununla belə, Telegram əvvəllər müxtəlif ölkələrin rəsmiləri tərəfindən zəif nəzarət və hüquq-mühafizə orqanları ilə əməkdaşlıq etməmək səbəbilə tənqid olunurdu. Məsələn, Fransız rəsmilərinin oxşar iddiaları 2024-cü ilin avqustunda Telegram-ın qurucusu Pavel Durov-un həbsi ilə nəticələndi. Durov, Telegram-ın uşaq istismarı materiallarının yayılması, dələduzluq və digər qanunsuz fəaliyyətlər üçün istifadə edildiyi iddiaları ilə ittiham olunub. Bu hadisədən sonra, sentyabr ayında Telegram siyasətlərində köklü dəyişikliklər etdi. Pavel Durov verdiyi açıqlamada, platforma rəhbərliyinin qanunsuz fəaliyyətlə məşğul olan istifadəçiləri hüquq-mühafizə orqanlarına şəxsən bildirəcəyini elan etdi.

     Dekabr ayında isə Telegram, uşaq istismarı ilə mübarizə aparan və bu kimi materialları internetdən çıxarmağı məqsəd qoyan əsasən Böyük Britaniya mərkəzli İnternet Nəzarət Fondu (IWF) olmaqla bir sıra vətəndaş cəmiyyəti təşkilatları ilə əməkdaşlığa başladı. Bu addım sayəsində platformadakı zərərli məzmunların müəyyən edilməsi və silinməsi daha effektiv hala gətirildi. 2024-cü il ərzində uşaq istismarı ilə əlaqəli 700 mindən çox qrup və kanal silindi. Moderatorlar, həmçinin, terror təşkilatları ilə bağlı demək olar ki, 130 min kanal və qrupu da platformadan çıxarıb. 2022-ci ildən etibarən hüquq-mühafizə orqanları və vətəndaş cəmiyyəti təşkilatları ilə əməkdaşlıq edilərək zorakılığa çağırış və ya terror təbliğatı edən 100 milyondan çox məzmunun yayılmasının qarşısı alınıb.