Meta Platforms şirkətinin Threads servisi öz funksionallığını genişləndirməyə davam edir. Məlum olub ki, sözügedən servisdə paylaşımlar üzrə axtarış imkanı istifadəyə verilib. Meta-nın CEO-su Mark Zuckerberg bildirib ki, sözügedən funksiya tədricən ingilis və ispan dilli istifadəçilər arasında istifadəyə verilir. Qeyd etmək lazımdır ki, Threads-də paylaşımlar üzrə axtarış imkanının testinə hələ bir neçə müddət bundan öncə start verilmişdi.

    Yaxın zamanda sözügedən funksiya ABŞ və Böyük Britaniyada aktivləşdiriləcək və üstəlik Threads-in veb versiyasına da inteqrasiya ediləcək. Məlumatda qeyd edilib ki, Threads-də paylaşımlar üzrə axtarış funksiyası bir qədər qeyri-standart şəkildə reallaşdırılıb. Belə ki, servisin axtarış sətrində lazımi sorğunu qeyd edib axtarışa verən zaman ilk növbədə axtarış sorğusunun kriteriyalarına yaxın olan istifadəçilərin siyahısı ortaya çıxır. Həmin siyahının yuxarı hissəsində isə sorğunun paylaşımlar üzrə axtarış bölməsi yerləşir.