TikTok-a qarşı hüquqi araşdırma başladılıb

    Technote.az “Engadget” platformasına istinadən bildirir ki, Kaliforniya ştatı TikTok platformasının Donald Trump əleyhinə olan paylaşımları senzura edib-etmədiyini araşdırmağa başlayıb. Ştatın qubernatoru Gavin Newsom bu barədə açıqlama verərək, məsələ ilə bağlı Kaliforniya Ədliyyə Departamentinə rəsmi yoxlama tapşırıldığını bildirib.

    Araşdırmaya səbəb olan iddialardan biri TikTok-da “Epstein” sözünün mesajlarda göndərilməsinin mümkün olmamasıdır. Newsom-un ofisi bildirib ki, bu sözü ehtiva edən birbaşa mesaj göndərmək istədikdə, tətbiq bunun icma qaydalarını poza biləcəyi ilə bağlı xəbərdarlıq göstərib. Qubernatorluq ofisi həmçinin, Trump-ı tənqid edən bəzi paylaşımların platformada məhdudlaşdırıldığını müstəqil şəkildə təsdiqlədiyini açıqlayıb.

    Bu hadisələr ByteDance-in ABŞ-dəki TikTok biznesini ayırmaqla bağlı razılaşmanı yekunlaşdırmasından bir neçə gün sonra baş verib. Yeni yaradılan TikTok USDS adlı birgə müəssisədə ByteDance-in payı 19,9 faizdir. Qalan 80 faiz isə yeni investorların nəzarətindədir. Oracle, Silver Lake və BƏƏ-nin MGX fondu hər biri 15 faiz paya sahibdir. ABŞ-dəki yeni struktur TikTok-un alqoritmini yerli məlumatlar əsasında yenidən öyrədəcək və məzmun moderasiyasına cavabdeh olacaq.

    Bu dəyişikliklərdən sonra istifadəçilər TikTok-da müxtəlif texniki problemlər yaşadıqlarını bildiriblər. Xüsusilə, ICE (ABŞ Miqrasiya və Gömrük Xidməti) ilə bağlı videoların yüklənməsində çətinliklər olduğu iddia edilib. TikTok isə bütün bu problemləri ABŞ-dəki məlumat mərkəzlərindən birində baş verən elektrik kəsintisi ilə əlaqələndirib və xidmətlərin bərpası üzərində çalışdıqlarını açıqlayıb.