TikTok ABŞ-də “Local Feed” funksiyasını işə saldı

    Technote.az “TechCrunch” platformasına istinadən bildirir ki, TikTok ABŞ-də istifadəçilər üçün yeni “Local Feed” funksiyasını istifadəyə verib. Bu yeni bölmə istifadəçinin dəqiq yerləşmə məlumatına əsaslanaraq yaxın ərazidəki restoranlar, tədbirlər, mağazalar, səyahət məkanları və yerli xəbərlərlə bağlı məzmunları göstərir.

    Şirkət bildirib ki, bu funksiya istifadəçilərin lokal icma ilə daha sıx əlaqə qurmasına kömək etmək məqsədi daşıyır. Lentdə göstərilən paylaşımlar istifadəçinin mövqeyi, məzmunun mövzusu və paylaşımın vaxtı əsasında formalaşdırılır. Bu isə daha aktual və real vaxt rejiminə yaxın yerli informasiya axını yaradır. TikTok son vaxtlar ABŞ-dəki yeni birgə müəssisə çərçivəsində istifadə şərtlərini yeniləyərək dəqiq yerləşmə məlumatlarının toplanacağını açıqlamışdı. Şirkət indi təsdiqləyir ki, bu məlumatlar məhz “Local Feed” funksiyasını işlətmək üçün lazımdır.

    Bununla belə, funksiya opt-in prinsipi ilə işləyir, yəni standart olaraq deaktivdir və istifadəçi istəsə aktivləşdirə bilər. İstifadəçilər yerləşmə məlumatlarının yalnız bir dəfə, tətbiqdən istifadə müddətində və ya ümumiyyətlə paylaşılmamasını seçə biləcəklər. Funksiya yalnız 18 yaşdan yuxarı istifadəçilər üçün aktiv olacaq və məlumatlar yalnız tətbiq istifadə edilərkən toplanacaq. Qeyd edək ki, “Local Feed” ötən ilin dekabrında Böyük Britaniya, Fransa, İtaliya və Almaniyada sınaqdan keçirilməyə başlanmışdı.