TikTok ABŞ-də satıldıqdan sonra ciddi texniki problemlərlə üzləşdi

    Technote.az “The Verge” platformasına istinadən bildirir ki, TikTok ABŞ-dəki fəaliyyətinin satılmasından sonra ilk həftəsonunu ciddi texniki problemlərlə keçirib. Platformada yaranan nasazlıqlar təkcə ABŞ istifadəçilərini deyil, bəzi hallarda digər ölkələrdəki istifadəçiləri də təsirləndirib.

    İstifadəçilər tətbiqə daxil ola bilmədiklərini, videolar yükləyə bilmədiklərini, şərhlərin açılmadığını və “For You” lentinin sanki tamamilə sıfırlandığını bildiriblər. Bəzi videolar saatlarla, hətta günlərlə “yoxlamadadır” statusunda qalıb və yayımlanmayıb. Problemləri yaşayanlar arasında The Verge jurnalistləri də var. DownDetector məlumatlarına görə, nasazlıqlar bazar günü səhər saatlarında pik həddə çatıb. Aradan vaxt keçməsinə baxmayaraq, bəzi istifadəçilər hələ də eyni problemlərlə qarşılaşdıqlarını deyirlər.

    Qeyd edək ki, ötən həftədən etibarən TikTok-un ABŞ əməliyyatları Oracle şirkətinin də daxil olduğu investisiya konsorsiumunun nəzarətinə keçib. Bu addım TikTok-un ABŞ-də mümkün qadağadan xilas edilməsi üçün atılıb. Yeni sahiblərlə birlikdə ABŞ istifadəçiləri üçün yenilənmiş istifadə şərtləri də qüvvəyə minib. Bu şərtlər daha dəqiq məkan məlumatlarının və istifadəçilərin süni intellektlə qarşılıqlı əlaqələrinin toplanmasını nəzərdə tutur.