TikTok-da kütləvi kəsinti problemi aradan qaldırıldı

     Technote.az “TechCrunch” platformasına istinadən bildirir ki, ABŞ-də yeni sahiblik strukturu altında fəaliyyət göstərən TikTok ötən həftə istifadəçilərin qarşılaşdığı texniki problemlərin aradan qaldırıldığını açıqlayıb. Platforma bazar günü verdiyi açıqlamada xidmətlərin tam bərpa edildiyini bildirib.

     Şirkət kəsintinin səbəbi kimi ABŞ-də baş verən güclü qar fırtınasını göstərib. Bildirilib ki, TikTok-un ABŞ əməliyyatlarını dəstəkləyən və Oracle tərəfindən idarə olunan əsas məlumat mərkəzlərindən birində elektrik enerjisinin kəsilməsi baş verib. Bu isə şəbəkə və məlumat saxlanması ilə bağlı problemlərə, on minlərlə serverin sıradan çıxmasına səbəb olub.

     TikTok-un X platformasında paylaşdığı açıqlamada qeyd olunub ki, nasazlıq kontent paylaşımı, kəşf bölməsi, videolardakı bəyənmə və baxış saylarının real vaxtda göstərilməsi kimi əsas funksiyalara təsir edib.

      Yanvar ayında ABŞ hökuməti TikTok-un yeni strukturla fəaliyyət göstərməsinə dair razılaşmanı yekunlaşdırıb. Razılaşmaya əsasən, ABŞ mərkəzli investor konsorsiumu olan TikTok USDS platformanın 80%-nə nəzarət edir, qalan 20% isə ByteDance-in payına düşür.