TikTok-da yeni trend: Valideynlər uşaqlarının mesajlarından mahnı hazırlayır

    Technote.az “Mashable” platformasına istinadən bildirir ki, sosial şəbəkələrdə yeni və maraqlı bir trend yayılmağa başlayıb. Valideynlər yeniyetmə övladlarının gündəlik mesajlarını süni intellekt vasitəsilə musiqiyə çevirərək onları emosional “emo” və pop-punk mahnılar formasında paylaşırlar. Xüsusilə TikTok və Instagram platformalarında yayılan bu trenddə valideynlər övladlarından gələn adi mesajları AI musiqi generatorlarına yükləyərək onları 2000-ci illərin emo və rok musiqilərinə bənzər mahnılar halına gətirirlər.

    Ən çox istifadə olunan platformalardan biri isə Suno adlı süni intellekt musiqi generatorudur. Bu servis vasitəsilə “Məktəbdən sonra mənə Starbucks al”, “İdman formamı unutmuşam”, “Çox acam” və ya “Məni gəlib götür” kimi sadə mesajlar dramatik və emosional mahnılara çevrilir. Nəticədə isə ortaya həm komik, həm də sosial mediada viral ola biləcək məzmun çıxır.

    Trendin populyarlaşmasının əsas səbəblərindən biri də bir çox valideynin gənclik dövründə emo və pop-punk musiqilərlə böyüməsi hesab olunur. Buna görə də hazırlanan AI mahnılar təsadüfi səslənmir, əksinə 2000-ci illərin məşhur “Warped Tour” musiqi atmosferini xatırladır və nostalji effekti yaradır.