TikTok şəxsi mesajları end-to-end encryption ilə qorumayacaq

    Technote.az “Mashable” platformasına istinadən bildirir ki, TikTok digər böyük sosial media platformalarından fərqli olaraq istifadəçilərin birbaşa mesajlarını end-to-end encryption ilə qorumağı planlaşdırmır. Bu barədə BBC-nin yaydığı hesabatda qeyd olunur.

    Şirkət bildirib ki, mesajların end-to-end encryption ilə şifrələnməsi hüquq-mühafizə orqanlarının və platformanın təhlükəsizlik komandalarının potensial təhlükəli fəaliyyətləri aşkarlamasını çətinləşdirə bilər. TikTok-un mövqeyinə görə, end-to-end encryption bəzi hallarda istifadəçilərin təhlükəsizliyini risk altına sala bilər, çünki bu zaman platforma və rəsmi qurumlar şəxsi yazışmalara çıxış əldə edə bilmir.

    Hazırda Instagram, Messenger və X kimi platformalar istifadəçilərə mesajlarını end-to-end encryption ilə qorumaq imkanı təqdim edir. Bu səbəbdən TikTok-un qərarı texnologiya sektorunda fərqli yanaşma kimi qiymətləndirilir.

    Bununla yanaşı, böyük texnologiya şirkətləri uzun müddətdir məxfilik və təhlükəsizlik balansı ilə bağlı müzakirələrin mərkəzindədir. Keçmişdə Meta kimi şirkətlər hüquq-mühafizə orqanlarının tələbi ilə istifadəçi məlumatlarını, o cümlədən şəxsi mesajları təqdim etməyə məcbur qalıb. Tənqidçilər isə hesab edir ki, end-to-end encryption-un olmaması istifadəçi məxfiliyini zəiflədə bilər.