TikTok tətbiqi ABŞ-da Google Play və Apple App Store mağazalarına geri qayıdıb

Sosial Media

14.02.2025

Emil

Əvvəlcə gözlənilirdi ki, Çin şirkəti ByteDance öz biznesinin satışında razılığa gələ bilmədiyi üçün TikTok sosial şəbəkəsinin ABŞ-da fəaliyyəti 19 yanvardan etibarən qadağan ediləcək. Bir neçə saatlıq fasilədən sonra platforma ABŞ-da fəaliyyətini davam etdirdi, lakin TikTok tətbiqi Apple və Google-un tətbiq mağazalarına yalnız ötən cümə axşamı axşam saatlarında qaytarıldı. ABŞ prezidenti postuna ikinci dəfə gələn gün Donald Trump, TikTok-un ölkədəki fəaliyyətinin qadağan olunmasını 75 gün, yəni 5 aprel tarixinə qədər təxirə salmağı əmr etdi. Bu müddət ərzində ByteDance ilə elə bir razılaşma mexanizminin tapılması planlaşdırılır ki, bu, ABŞ tərəfinə TikTok-un ölkədəki fəaliyyətinə nəzarət imkanı versin.

Trump, ABŞ hökumətinin azı 50% paya sahib olacağı birgə müəssisənin yaradılmasını təklif edirdi. TikTok-un ABŞ-dakı biznesinin mümkün alıcıları arasında Trump-ın yaxın tərəfdarlarından biri olan Elon Musk-ın da adı hallanırdı, lakin milyarder bu barədə yayılan şayiələri təkzib etdi. Dünən axşam yerli vaxtla ABŞ istifadəçiləri Google və Apple-ın rəsmi tətbiq mağazalarından TikTok-u yenidən yükləmək və quraşdırmaq imkanını əldə etdilər. Android platforması hələ də tətbiqlərin üçüncü mənbələrdən quraşdırılmasına icazə verdiyi üçün bu cür məhdudiyyətləri aşmaq mümkündür.

Lakin Apple ekosistemi bu baxımdan daha sərt qaydalara malikdir. Bu vəziyyət hətta ikinci əl smartfon bazarında spekulyativ təkliflərin yaranmasına səbəb oldu. Belə ki, ABŞ-da TikTo-un quraşdırılmış olduğu iPhone-lar minlərlə dollara satılmağa başladı. CNBC-nin məlumatına görə, TikTok-un ABŞ-da rəsmi tətbiq mağazalarından təxminən 1 ay ərzində yoxa çıxması bu sosial şəbəkənin istifadəçi trafikini ciddi şəkildə azaltmadı. Platforma, 19 yanvar tarixində yükləmə və quraşdırma qadağası qüvvəyə minməzdən əvvəlki səviyyənin təxminən 90%-ni bərpa etməyi bacarıb.

Mənbə: CNBC

Paylaş

Bənzər xəbərlər