TikTok və Snap “asılılıq” iddiası üzrə məhkəmə işini razılaşma ilə bağladı

    Technote.az “TechCrunch” platformasına istinadən bildirir ki, TikTok və Snap sosial şəbəkələrin istifadəçiləri qəsdən asılı vəziyyətə saldığı iddiası ilə bağlı açılmış səs-küylü məhkəmə işində razılaşmaya gedib.

    Bazar ertəsi axşamı TikTok məhkəmə prosesini razılaşma yolu ilə bağlayıb. Bir həftə əvvəl isə eyni addımı Snap atmışdı. Bununla belə, işin digər cavabdehləri olan Meta və YouTube üçün proses davam edir və artıq çərşənbə axşamı münsiflərin seçimi ilə məhkəmə mərhələsi başlayır. İşin mərkəzində hazırda 19 yaşı olan və məhkəmə sənədlərində K.G.M. baş hərfləri ilə qeyd edilən gəncin iddiası dayanır. İddiaya görə, sosial media platformaları məhsullarını bilərəkdən asılılıq yaradacaq şəkildə dizayn edib və bu da istifadəçilərə psixoloji zərər vurub. Bu məhkəmə işi oxşar iddialarla açılmış onlarla proses üçün presedent ola bilər.

    Məhkəmədə Meta şirkətinin rəhbəri Mark Zuckerberg və YouTube platformasının rəhbəri Neal Mohan-ın şahid qismində ifadə verəcəyi gözlənilir. Bu isə prosesin həm hüquqi, həm də ictimai baxımdan daha böyük diqqət çəkməsinə səbəb olur. Qeyd edək ki, TikTok və Snap-in razılaşmaya getməsi ittihamları qəbul etdikləri anlamına gəlmir. Şirkətlər iddiaçı ilə məhkəmədən kənar anlaşmaya gəlib, lakin razılaşmanın maliyyə və digər detalları açıqlanmır.