Twitter nəşriyyatlara ekzklüziv kontentlər üçün adi abunəliklərdən əlavə daha bir monetizasiya üsulunu təklif edib. Elon Musk-ın verdiyi məlumata əsasən bu aydan başlayaraq nəşriyyatlar sosial şəbəkə daxilində paylaşdıqları ayrı-ayrı məqalələrə görə də istifadəçilərdən ödəniş əldə edə biləcəklər. “Bu aydan etibarən istifadəyə veriləcək bu platforma media nəşriyyatlarına bir kliklə istifadəçilərdən ayrı-ayrı məqalələr üçün ödəniş əldə etməyə imkan verəcək” - deyə Musk qeyd edib. Bundan əlavə olaraq Musk qeyd edib ki, Twitter Blue abunəliyinə sahib olmayan istifadəçilər bu cür məqalələri əldə etmək üçün daha çox ödəniş etməli olacaqlar. Hansı hesabların və kütləvi informasiya vasitələrinin bu imkandan faydalana biləcəkləri barəsində məlumat verilməyib. Bundan əlavə olaraq bu mövzuda Twitter-in öz komissiyasının nə qədər təşkil edəcəyi də aydın deyil.