WhatsApp-da mesajların tərcümə funksiyası istifadəyə verilib

     WhatsApp istifadəçinin seçdiyi dilə mesajların daxili tərcüməsini tədricən tətbiq etməyə başladığını açıqlayıb. Bu imkan iPhone və Android sahibləri üçün tamamilə pulsuz olacaq. Tərcümə funksiyası mesajın üzərinə uzun müddət toxunaraq, daha sonra “Translate” düyməsini seçməklə aktivləşdirilir. Bundan sonra mesajın hansı dilə tərcümə olunacağı seçilə bilər. Funksiya şəxsi söhbətlərdə, qruplarda və kanallarda işləyir. Android istifadəçiləri isə bütün gələn mesajlara şamil olunmaq üçün tam söhbət zəncirləri üzrə avtomatik tərcüməni aktivləşdirə bilərlər. Android istifadəçiləri üçün ilkin mərhələdə ingilis, ispan, hindi, portuqal, rus və ərəb dillərindən tərcümə dəstəyi əlçatan olacaq, iPhone istifadəçiləri isə mesajları 19-dan çox dilə tərcümə edə biləcəklər. WhatsApp gələcəkdə tərcümə dəstəyini digər dillərə də genişləndirməyi planlaşdırır. Qeyd etmək lazımdır ki, yeni funksiya real vaxt rejimində tərcüməni əhatə etmir.