main-post-cover

    Whatsapp-da Telegram-dakı kanalların analoqu istifadəyə verilib

    Sosial Media
    08.06.2023
    Emil Nəcəfov
        Whatsapp rəsmiləri messencerdə yeni funksiyanın istifadəyə verildiyini elan ediblər. Söhbət, kanallardan (Channels) gedir. Verilmiş məlumata əsasən Whatsapp daxilində istifadəyə verilmiş kanallar vacib xəbərləri izləmək üçün rahat, etibarlı və konfidensial üsuldur. Bu bir növ Telegram-dakı kanalları xatırladır. Kanalların adminləri öz kanallarında foto, video, stikerlər və sorğular da daxil olmaqla müxtəlif növ kontenti bölüşə biləcəklər. Kanallara abunə olmuş istifadəçilər isə paylaşılan kontentləri yalnız izləyə biləcəklər. Onlar abunə olduqları kanallarda paylaşım etmə imkanına sahib olmayacaqlar.
        İstifadəçilərin abunə olacaqları kanallar çatlardan ayrıca yerləşəcəklər. Messencer daxilində yerli dövlət orqanlarından xəbərlərə, idman kontentlərinə, əyləncəyə və s. mövzulara aid kanallardan ibarət kataloq yaradılıb. İstifadəçi lazımi kanalı kataloqda axtara və ya istədiyi kanala dəvət vasitəsilə abunə ola bilər. Whatsapp tərtibatçıları kanallardakı konfidensiallığa ciddi şəkildə diqqət ayırıblar. Belə ki, bu və ya digər kanal admininin fotosu ilə telefon nömrəsi abunəçilərə görünməyəcək. Abunəçilərin telefon nömrələri də kanallar çərçivəsində hamıdan gizli qalacaq. Bundan əlavə olaraq istifadəçilərin hansı kanallara abunə olduqları da bilinməyəcək.
        Bu və ya digər kanalda edilmiş paylaşımın tarixçəsi 30 gündən çox saxlanmayacaq. Kanalların adminləri istifadəçilərin kanallardakı paylaşımlara baxdıqları zaman onların screenshot fotolarını çəkməyi və paylaşımların digərlərinə göndərilməsini qadağan edə biləcəklər. Bununla yanaşı adminlər öz kanallarına konkret olaraq kimlərin abunə ola biləcəklərini də təyin edə və öz kanallarını axtarış nəticələrində gizlədə biləcəklər. Bu yeni funksiya ilk növbədə dünyanın aparıcı kütləvi informasiya vasitələri və Kolumbiya ilə Sinqapurdakı bəzi dövlət təşkilatları üçün istifadəyə verilib. Lakin yaxın aylar ərzində kanallar hamı üçün aktivləşəcək və istənilən istifadəçi öz kanalını yarada biləcək.
    Linki kopyala