Whatsapp tərtibatçıları messenceri təkmilləşdirməyə davam edirlər. Bu dəfə Whatsapp-da Chat Lock adlı funksiya istifadəyə verilib. Bu yeni funksiya istifadəçilərə özəl çatları smartfonun şifrəsi və ya biometrik autentifikasiya vasitəsilə daxil olmağı mümkün edən ayrıca qovluğa köçürtməyə imkan verir. Beləliklə özəl çatların qapalı qovluğa köçürülməsindən sonra həmin qovluğa daxil olmaq üçün smartfonun şifrəsindən, barmaq izi və ya üz skanından istifadə etmək lazım gələcək.

    Qapalı qovluqda yerləşəcək çatlara gələn mesajları əks etdirən bildirişlər də smartfonun bildirişlər panelində avtomatik olaraq gizli qalacaqlar. Qeyd etmək lazımdır ki, qapalı qovluğa özəl çatlarla birlikdə həmçinin qrup çatlarını da əlavə etmək olar. Özəl və ya qrup çatını qapalı etmək üçün sadəcə olaraq çat daxilində həmsöhbət şəxsin və ya qrup çatının fotosuna klikləyərək ortaya çıxan müvafiq bəndi seçmək lazımdır. Chat Lock funksiyası istifadəçinin bu və ya digər səbəbdən öz smartfonunu digər şəxsə verməsi zamanı lazımlı ola bilər. Məlumatda qeyd edilib ki, bu funksiya tədricən hamı üçün aktivləşdirilir.