Dünyanın ən məşhur ani mesajlaşma tətbiqi WhatsApp, bütün istifadəçiləri məmnun edəcək bir xüsusiyyət üzərində çalışır. WaBetaInfo-nun paylaşdığı məlumatlara görə, tezliklə WhatsApp fərqli dillərdə gələn mesajları avtomatik olaraq sizin dilinizə çevirəcək. X və ya Instagram istifadəçiləri bilirlər ki, fərqli dildə olan bir paylaşım və ya şərh gördükdə altındakı "Translate" düyməsinə toxunduqda mətn avtomatik olaraq sizin dilinizə çevrilir. Eyni funksiyanın tezliklə WhatsApp mesajlarında da mövcud olacağı bildirilir.

     WhatsApp-ın demək olar ki, bütün ölkələrdə istifadə edildiyini nəzərə alsaq, bu mesaj tərcümə funksiyasının beynəlxalq əlaqələri asanlaşdıracağını demək mümkündür. Dünyanın istənilən yerində yaşayan biri ilə danışarkən öz dilinizdə mesaj yazmaq və özünüzü düzgün ifadə etmək daha rahat olacaq.

     Ancaq burada bəzi vacib detalları nəzərə almaq lazımdır. Mesajların tərcümə edilə bilməsi üçün onların oxuna bilməsi vacibdir. Meta-nın WhatsApp mesajlarını özünün belə oxuya bilmədiyini bildirdiyini nəzərə alsaq, bu funksiyanın necə işləyəcəyi maraq doğurur. Görüntülərdən məlum olur ki, tərcümə funksiyası üçün dil paketlərini yükləmək lazım olacaq. Bu isə mesajların onlayn serverə qoşulmadan cihazın özündə tərcümə ediləcəyini göstərir.