X-in (keçmiş Twitter) yeni istifadəçiləri məcburi illik ödəniş etməli olacaqlar

     Elon Musk X (keçmiş Twitter) üçün nəzərdə tutulmuş növbəti yeniliyi anons edib. Belə ki, bundan sonra X-in hər yeni istifadəçisi sosial şəbəkədən istifadə etmək üçün simvolik məbləğdə illik ödəniş etməli olacaq. Bu, X-in “Not a Bot” adlı proqramı çərçivəsində atılmış növbəti addımıdır. Sözügedən proqram X-də fake hesablarla mübarizə aparmaq üçün nəzərdə tutulub. Musk-ın sözlərinə əsasən bu proqram fake hesabların və botların aktivlikləri ilə mübarizənin aparılmasında əlavə tədbir olacaq.

     “Not a Bot” proqramı ilk növbədə Yeni Zelandiyanı və Filippini əhatə edəcək. Bu ölkələrdə X-də veb üzərindən qeydiyyatdan keçmiş yeni istifadəçilər sosial şəbəkənin baza funksiyalarına sahib olmaq üçün ildə 1$ ödəniş etməli olacaqlar. Bununla yanaşı onlar öz hesablarını mobil nömrə vasitəsilə təsdiqləməli olacaqlar. İllik 1$ ödənişi etməkdən imtina edəcək yeni istifadəçilər X-də sadəcə olaraq mesajlara və videolara baxmaq imkanına sahib olacaqlar. Sosial şəbəkənin digər imkanları onlar üçün aktiv olmayacaq.