X sosial şəbəkəsi (keçmiş Twitter) öz konfidensiallıq siyasətində bəzi dəyişikliklər edib. Belə ki, sosial platforma öz konfidensiallıq siyasətinə istifadəçilərin identifikasiya məqsədləri üçün onların biometrik məlumatların yığılması bəndini əlavə edib. Bununla yanaşı istifadəçilərə lazımi vakansiyaların, onlar barəsində məlumatların potensial işəgötürənlərə təqdim edilməsi və daha yaxşı hədəflənmiş reklamların sərgilənməsi istiqamətində platforma istifadəçilərin məşğulluq və təhsil ilə bağlı məlumatlarını da əldə edəcək.

    “Sizin razılığınızla biz təhlükəsizlik, məlumatların qorunması və identifikasiya məqsədləri üçün sizin məlumatlarınızı yığa və onları istifadə edə bilərik” - edeyə şirkətin yeni konfidensiallıq siyasətində qeyd edilib. Bununla belə konfidensiallıq siyasətində istifadəçinin hansı biometrik məlumatlarının yığılacağı və onların necə istifadə olunacaqları barəsində məlumat qeyd edilməyib. Şirkət həmçinin istifadəçilərin məşğulluq və təhsil ilə bağlı məlumatlarını yığacağı barəsində məlumatı da bildirib. Qeyd etmək lazımdır ki, keçən həftə şirkət X Hiring adlı platformanı istifadəyə vermişdi. Sözügedən platforma vasitəsilə şirkətlər öz vakansiyalarını X-də yerləşdirə bilərlər.